बंगळूर : राष्ट्रीय तपास संस्थेने (NIA) हैदराबाद (Hyderabad) हेरगिरीप्रकरणी संशयित नुरुद्दीन ऊर्फ ​​रफी याला अटक केली. नुरुद्दीन जामिनावर बाहेर आला असून, तो अनेक दिवस बेपत्ता होता. त्याला म्हैसूरच्या राजीवनगरमध्ये अटक करण्यात आले आहे. नुरुद्दीनवर ५ लाखांचे बक्षीस जाहीर केले आहे.

बुधवारी एनआयए अधिकाऱ्यांनी काही कारणास्तव त्याच्या राजीवनगर येथील घरावर छापा टाकला. त्याच्या घरातून मोबाईल फोन, लॅपटॉप, पेन ड्राईव्ह आदी वस्तू जप्त केल्या. नुरुद्दीन ऑगस्ट २०२३ मध्ये जामिनावर बाहेर आला होता आणि चेन्नईतील विशेष एनआयए न्यायालयात (NIA Court) हजर न होता तो फरार झाला होता.

या पार्श्वभूमीवर न्यायालयाने आरोपी नुरुद्दीनविरुद्ध अजामीनपात्र वॉरंट जारी केले होते. आता नुरुद्दीनला एनआयएच्या पथकाने अटक केली आहे. सात मे २०२४ रोजी न्यायालयाने त्याला गुन्हेगार घोषित केले होते. २०१४ मध्ये बंगळूरमधील इस्रायलचा दूतावास आणि चेन्नईतील अमेरिकन दूतावास उडवण्याचा कट रचल्याचा आरोप त्याच्यावर आहे.

२०१४ मध्ये एनआयए अधिकाऱ्यांनी श्रीलंकन ​​नागरिक मोहम्मद साकीर हुसेन आणि पाकिस्तानी नागरिक अमीर जुबेर सिद्दीकी, कोलंबो येथील पाकिस्तानच्या राजनैतिक कार्यालयातील कर्मचारी यांना अशाच आरोपाखाली अटक केली होती. आरोपींना बनावट भारतीय नोटांचा पुरवठा करून दहशतवादी कृत्यांना मदत आणि प्रोत्साहन दिल्याच्या आरोपाखाली नुरुद्दीनवरही गुन्हा दाखल करण्यात आला होता. आरोपी नुरुद्दीनने बनावट नोटा चलनात आणून या कृत्यासाठी आवश्यक निधी उभारला.