नवी दिल्ली- पुरीमध्ये भगवान बलभद्रची मूर्ती ( Lord Balabhadra) अंगावर पडून जगन्नाथ मंदिराचे किमान ९ सेवक जखमी झाले आहेत. पुरीमध्ये रथ यात्रा सुरू आहे. यावेळी अपघाताने भगवान बलभद्रची मूर्ती सेवकांच्या अंगावर पडली. मंगळवारी रात्री ही घटना घडली आहे. यासंदर्भातील एक व्हिडिओ समोर आला आहे.

रथामधून मूर्ती मंदिरामध्ये ठेवली जाणार होती. सेवकांनी मूर्तीला उचलले पण त्यांना ती आवरली नाही अन् ती अंगावर पडली. यात जवळपास ९ जण जखमी झाले आहेत. जखमींना रुग्णालयात दाखल करण्यात आले असून त्यांच्यावर उपचार सुरू आहेत. पीटीआयने यासंदर्भातील वृत्त दिलं आहे.

पुरीचे जिल्हाधिकारी सिद्धार्थ शंकर स्वेन यांनी सांगितलं की, नऊ पैकी पाच जणांना हॉस्पिटलमध्ये दाखल करण्यात आल आहे, तर इतर चार जणांना किरकोळ जखमा झाल्या आहेत. पहंडी विधी करत असताना हा अपघात घडला. व्हिडिओ पाहून समजतंय की, ज्या सेवकांकडे भगवानाची मूर्ती सांभाळण्याची जबाबदारी होती. त्यांना मूर्ती आवरली नाही आणि हा अपघात घडला.

ओडिशाचे मुख्यमंत्री मोहन चरण मांझी यांनी या घटनेबाबत काळजी व्यक्त केली आहे. कायदा मंत्री पृथ्वीराज हरिचंदन यांना घटनास्थळी तात्काळ भेट देण्याचे आदेश त्यांनी दिलेत. तसेच, सर्व प्रकारची मदत करण्यास सांगितलं आहे. पुरी भगवान जगन्नाथ मंदिर हे राज्य सरकारच्या कायदा विभागाच्या अखत्यारीत येतं. मुख्यमंत्र्यांनी गंभीर जखमींच्या बरे होण्यासाठी प्रार्थना केली आहे.