Nitish Kumar with NDA : बिहारमध्ये राजकीय भूकंप झाला आहे. आरजेडीची साथ सोडून नितीश कुमारांनी विद्यमान सरकार विसर्जित केलं. आता सायंकाळी पाच वाजता भाजपसोबत जात ते पुन्हा मुख्यमंत्री पदाची शपथ घेणार आहेत.

विशेष म्हणजे दोन भाजप नेते उपमुख्यमंत्री पदाची शपथ घेतली. नितीश कुमार यांनी रविवारी सकाळी राज्यपालांकडे राजीनामा सुपूर्द केला. त्यामुळे जेडीयू आणि आरजेडीचं सरकार कोसळलं आहे. राज्यपाल राजेंद्र अर्लेकर यांनी नवीन सरकार स्थापनेचा दावा स्वीकारला असून बिहारमध्ये आता एनडीएचं सरकार स्थापन होत आहे.

भाजपने विजय सिन्हा आणि सम्राट चौधरी यांच्यावर उपमुख्यमंत्री पदाची जबाबदारी देण्याचं निश्चित केलं आहे. शिवाय रविवारी सायंकाळी शपथ घेणाऱ्या मंत्र्यांची संभाव्य यादी समोर आलेली आहे. 'इंडियन एक्स्प्रेस'ने यासंबंधीचे वृत्त दिले आहे.

आज शपथ घेणारे मंत्री

1. सम्राट चौधरी (भाजप)

2. विजय कुमार सिन्हा (भाजप)

3. डॉ. प्रेम कुमार (भाजप)

4. विजय कुमार चौधरी (जेडीयू)

5. बिजेंद्र प्रसाद यादव (जेडीयू)

6. श्रावण कुमार (जेडीयू)

7. संतोष कुमार सुमन (HAM)

8. सुमित कुमार सिंग (अपक्ष)

नव्या सरकारमध्ये भूमिहार नेता विजय सिन्हा आणि मागास समाजाचे सम्राट चौधरी यांना उपमुख्यमंत्री पद दिलं जाणार आहे. नव्या सरकारला जीतनराम मांझी यांनी देखील पाठिंबा दिला आहे. त्यांच्याकडे चार आमदार आहेत. शपथविधी सोहळ्याला उपस्थित राहण्यासाठी भाजपचे अध्यक्ष जेपी नड्डी हे पाटण्याला रवाना झाले आहेत.