नवी दिल्ली - मणिपूरमधील महिला अत्याचाराच्या घटनेवरून विरोधीपक्ष आक्रमक झाला आहे. त्यातच काही दिवसांपूर्वीच विरोधकांनी इंडिया नावाची आघाडी तयार केली असून एकतेने मोदी सरकारविरुद्ध मोर्चा उघडला आहे. तर तिकडे पंतप्रधान नरेंद्र मोदींनी मणिपूरमधील हिंसाचारावरून आपली भूमिका स्पष्ट केली नाही. आजअखेर मोदींनी सभागृहात भाषण केलं. मात्र एक तासाच्या भाषणात मोदींनी मणिपूरचा चकार शब्द काढला नाही.

मोदींनी अविश्वास ठरावाच्या प्रस्तावर भाषण करताना मोदींनी विरोधकांवर चौफेर टीका केली. यावेळी त्यांनी सर्व राज्यातील स्थिती सांगत काँग्रेसवर हल्लाबोल केला. यावेळी मोदींनी बिहार, तामिळनाडू, उत्तर प्रदेश राज्यातील काँग्रेसची स्थिती सांगण्याचा प्रयत्न केला. त्याचवेळी विरोधक मणिपूर-मणिपूरच्या घोषणाबाजी करत आहेत.

मोदींचे आतापर्यंत एक तासाहून अधिक वेळ भाषण झाले. मात्र अद्याप मोदींनी मणिपूरचा उल्लेखही भाषणात केला नाही. यावरून विरोधक आक्रमक झाले असून सभागृहात मणिपूरच्या घोषणा देत आहेत.

वास्तविक पाहता, विरोधकांनी सरकारविरोधात अविश्वास प्रस्तावच मणिपूर मुद्दावर मोदींनी भूमिका स्पष्ट करावी, यासाठी आणला होता. मात्र अजुनही मोदी मणिपूरवर बोलत नसल्याने विरोधक आक्रमक झाले आहेत.