म्हाडाच्या घरांसाठी आमदारांना ७० लाख रुपये आकारण्यात येणार असल्याचं, राज्याचे गृहनिर्माण मंत्री जितेंद्र आव्हाड यांनी ट्विटमध्ये म्हटलंय. मुंबईमध्ये सर्वपक्षीय आमदारांना घर देण्याची घोषणा मुख्यमंत्री उद्धव ठाकरे यांनी गुरुवारी केलीय. मात्र विरोधकांनी आणि नेटकऱ्यांनी या निर्णयावर टिका केली. आमदार पळून जाण्याची भिती असल्यानेच आमदारांना घर द्यावी लागत असल्याची टिका भाजपाचे प्रदेशाध्यक्ष चंद्रकांत पाटलांनी केलीय. तर सामाजिक कार्यकर्ते हेरंब कुलकर्णी यांनी मुख्यमंत्र्यांना पत्र लिहून याविषयी नाराजी व्यक्त केलीय.

आमदारांना अनेक सोयीसुविधा असताना परत घरांचा लाभ कशासाठी असा सूर उमटताना दिसतोय. अनेक आमदार कोट्याधीश असून ते मुंबईत घर घेऊ शकतात.तसंच आमदार फार कमी काळ मुंबईत असतात,अशा प्रतिक्रिया उमटतायत.

आमदारांना ३०० घर देण्यात येणार या घोषणेनंतर मोठ्या प्रमाणात गदारोळ उडालाय. यावर ट्विट करत आव्हाडांनी म्हटलं," मी यावर स्पष्टीकरण देउ इच्छितो की, म्हाडाच्या सदनिकांच्या जागांचा खर्च आणि बांधकाम खर्च अशी ७० लाख रुपयांची किंमत आमदारांना मोजावी लागणार आहे. ' आमदारांनी दिलेल्या प्रतिज्ञापत्रावरून भाजपाचे १०५ आमदार कोट्याधीश असून, शिवसेनेचे ५१, राष्ट्रवादी काॅंग्रेसचे ४७ तर काॅंग्रेसचे ४२ आमदार कोट्याधीश आहेत.