नवी दिल्ली - सुहेलदेव भारतीय समाज पक्षाचे राष्ट्रीय (एसबीएसपी) अध्यक्ष आणि माजी कॅबिनेट मंत्री ओमप्रकाश राजभर लोकसभा निवडणुकीपूर्वी एनडीएत प्रवेश केल्यापासून विरोधकांवर हल्ला बोल करत आहेत. गोरखपूरमध्ये पत्रकारांशी बोलताना ते म्हणाले की, उत्तर प्रदेशात लवकरच समाजवादी पक्षाची जागा आमचा एसबीएसपी घेईल.

महिलांना संघटित करण्याचे काम आमच्या पक्षाने केले आहे. एसबीएसपीच्या कार्यक्रमाला १० ते २० हजार लोक जमतात. मैनपुरी, सहारनपूर, झाशी आणि गोरखपूर येथील सभा सुभासपाची ताकद दर्शवतात, असे राजभर म्हणाले. आज प्रत्येक पक्षाला एसबीएसपीला सोबत घ्यायचे आहे. विधानसभा निवडणुकीत एसबीएसपी-सपाची युती झाली होती. युतीने १२५ जागा जिंकल्या होत्या, पण आता 'सपा'सोबतचे नाते संपुष्टात आल्याचं राजभर म्हणाले.

राजभर म्हणाले की, सपाचे लोकसभा निवडणुकीत खातेही उघडणार नाही. त्यामुळे समाजवादी पक्ष नाराज आहे. शिवपाल यादव यांनाही वास्तव माहित आहे. संसदेत विरोधकांनी मांडलेल्या अविश्वास प्रस्तावावर हल्ला चढवत राजभर म्हणाले की, २०२४ च्या लोकसभा निवडणुकीची परिस्थिती स्पष्ट झाली आहे. विरोधकांच्या ऐक्यात काहीच दम नाही. त्यामुळे ते निवडणूक जिंकण्याचा प्रश्नच उद्भवत नाही. उत्तर प्रदेशात लोकसभेच्या ८० जागा लढवण्याचे आव्हान त्यांनी समाजवादी पक्षाला दिले.

शिवपाल यादव यांच्याकडून आलेल्या प्रस्तावावर ओमप्रकाश राजभर म्हणाले की, सपात परत जाण्याचा प्रश्नच उद्भवत नाही. उलट शिवपाल यादव स्वत: एनडीएत प्रवेश करणार आहेत. ते लोकांना लवकरच पाहायला मिळणार आहे.