Tirumala temple's affidavit rule for non-Hindus:

आंध्र प्रदेशचे उपमुख्यमंत्री पवन कल्याण यांनी बुधवारी तिरुमला तिरुपती मंदिराला भेट देत व्यंकटेश्वराचे दर्शन घेतले. त्यांच्याबरोबर त्यांची मुलगी पलिना अंजनी कोनिडेला ही देखील होती.

माजी मुख्यमंत्री जगनमोहन रेड्डी यांच्या सरकारच्या काळात बालाजीच्या लाडूप्रसादासाठी वापरण्यात येणाऱ्या तुपामध्ये जनावरांची चरबी मिसळली जात असल्याचा आरोप करण्यात आल्यानंतर पवन कल्याण यांनी ११ दिवसांचे प्रायश्चित्त व्रत घेतले होते.

बालाजीचे दर्शन फक्त हिंदूंनाच घेता येते का?

पवन कल्याण यांची कन्या पलिना हिने भगवान व्यंकटेश्वरावर श्रद्धा असल्याचे प्रतिज्ञापत्र मंदिर समितीकडे सोपविले. त्यानंतर तिला मंदिरात प्रवेश करता आला.

पवन कल्याण यांची पत्नी मूळची रशिया येथील आहे. व्यवस्थापनाच्या नियमानुसार तिरुपती मंदिरामध्ये बिगर हिंदू किंवा परदेशी व्यक्तींना प्रवेश करायचा असल्यास त्यांनी त्यांची श्रद्धा असल्याचे प्रतिज्ञापत्राद्वारे मंदिर समितीला सादर करावे लागते. तो त्यामुळे पलिना हिने प्रतिज्ञापत्र सादर केले आहे.

जनसेना पक्षाने आपल्या प्रसिद्धीपत्रकात म्हटले आहे की, "तिरुमला येथे श्रीवरीचे (देवतेचे) दर्शन घेण्यापूर्वी, पलिना अंजनी कोनिडेला यांनी दर्शनासाठी घोषणापत्र दिले. त्यांनी टीटीडी कर्मचाऱ्यांनी दिलेल्या कागदपत्रांवर स्वाक्षरी केली. मात्र, सध्या पलिना अंजनी अल्पवयीन आहेत. त्यामुळे त्यांचे वडील पवन कल्याण यांनी मंदिराच्या सर्व कागदपत्रांना आपली सही करत संमती दिली आहे.