लोकसभेच्या हिवाळी अधिवेशनाला (Parliament Winter Session) २९ नोव्हेंबरपासून सुरूवात झाली. या अधिवेशनाची सुरूवातच मोठ्या गदारोळाने झाली असून, राज्यसभेतील (Rajya Sabha) १२ सदस्यांना निलंबित करण्यात आलंय. त्यावरून विरोधी पक्षांकडून आंदोलन करण्यात येत आहेत. आज याच गोंधळामुळे लोकसभा आणि राज्यसभा या दोन्ही सभागृहांचं कामकाज स्थगित करण्यात आलं . या दरम्यान आज काँग्रेस नेते राहुल गांधी (Rahul Gandhi), शिवसेना खासदार संजय राऊत (Sanjay Raut) आणि विरोधीपक्षाच्या प्रमुख नेत्यांनी लोकभेच्या परिसरात आंदोलन केलं.

राहुल गांधी यांनी यावेळी बोलताना पंतप्रधान नरेंद्र मोदींच्या लोकसभेतील अनुपस्थितीवर प्रश्न उपस्थित केला. तसेच काही वेळापूर्वी एक ट्विट करत त्यांनी लोकसभेत चर्चा आणि विरोध यांचं महत्व या विषयावर शिकवणी घेणं आवश्यक असल्याचं मत व्यक्त केलं. ज्या मुद्द्यांवर आम्हाला बोलायचं ते बोलू दिलं जात नाही, संसदेत चर्चा झाली पाहिजे. आम्हाला सरकारला प्रश्न विचारायचे आहेत, मात्र ते विचारू दिले जात नाही असे गंभीर आरोप त्यांनी केला. यावेळी पुन्हा एकदा शिवसेना खासदार संजय राऊत आणि राहुल गांधी हे सोबत दिसून आले आहेत.

संजय राऊत काय म्हणाले?

विरोधकांनी केलेल्या निदर्शनादरम्यान संजय राऊत म्हणाले की, जवळपास २ आठवड्यांपासून संघर्ष सुरु आहे. सकाळी आम्ही जेव्हा आंदोलन सुरू केलं तेव्हा आम्ही फक्त लोकशाही वाचवा आणि न्याय द्या अशी विनंती केली. तेव्हा आम्ही त्यांनाही म्हटला की आम्हालाही निलंबित करा. आम्ही शेवटपर्यंत लढू, आम्ही झूकणार नाही असंही ते म्हणाले आहेत.