बंगळुरु : चंद्रानंतर आता सूर्याचा अभ्यास करण्यासाठी भारताकडून आदित्य मिशन लवकरच लॉन्च करण्यात येणार आहे. या मिशनच्या लाँचिंगची रंगीत तालीम भारतीय अंतराळ संशोधन संस्थेकडून (ISRO) नुकतीच पूर्ण झाली. या रंगीत तालमीदरम्यान काय काय घडलं? हे तुम्हाला फोटोंच्या माध्यमातून पाहता येईल. (Photos ISRO completes launch rehearsal vehicle check of Aditya L1 mission)

रंगीत तालमीत काय घडलं?

आदित्य L1 यानाची अंतर्गत तपासणी पूर्ण झाली. त्यानंतर आता हे यानं अवकाशात झेपावण्यासाठी सज्ज झालं आहे. या सर्व तयारीसह इस्त्रोनं या मोहिमेच्या यशस्वी लाँचिंगसाठी रंगीत तालीमही पूर्ण केली आहे.

आदित्य मिशनचा हेतू काय?

आदित्य L1 मिशनचा प्रमुख हेतू अंतराळातून सूर्यावरील घडामोडींचं निरीक्षण करणं हा आहे. सूर्याचा अभ्यास करताना त्याची अनुकूल कार्यक्षमता कशी आहे? तसेच सूर्याचं वर्तन आणि त्याच्या वर्तनाचे परिणाम याचा अभ्यास केला जाणार आहे.

कधी होणार लॉन्च?

भारत पहिल्यांदाच अंतराळात सूर्य निरीक्षण मोहिम लॉन्च करणार आहे. या मोहिमेला आदित्य L1 मिशन असं नाव देण्यात आलं आहे. शनिवार, २ सप्टेंबर २०२३ रोजी सकाळी ११.५० मिनिटांनी आंध्र प्रदेशातील श्री हरिकोटा इथल्या इस्त्रोच्या सतीश धवन अंतराळ केंद्रातून हे यान लॉन्च केलं जाणार आहे. इस्त्रोचं सर्वाधिक विश्वसनीय PSLV XL या रॉकेटच्या माध्यमातून हे यानं सूर्याच्या दिशेनं झेपावणार आहे.

यानानं उड्डाण केल्यानंतर नेमकं काय करणार?

आदित्य L1 यानाचं उड्डाण झाल्यानंतर पृथ्वीच्या सर्वात जवळच्या कक्षेत वेधशाळा स्थापित करणार आहे. त्यानंतर लंबवर्तुळाकार कक्षा गाठण्यासाठी अंतराळयानाचा मार्ग निश्चित केला जाईल, ऑनबोर्ड प्रोपल्शन सिस्टमद्वारे हळूहळू ते लॅग्रेंज पॉइंटच्या (L1) जवळ आणलं जाईल.

चार महिन्यांचा कालावधी अपेक्षित

L1च्या प्रवासादरम्यान, अंतराळयान पृथ्वीच्या गुरुत्वाकर्षण क्षेत्राच्या प्रभावातून (SOI) बाहेर पडेल. यानंतर, समुद्रपर्यटन टप्पा सुरू होईल. ते यान नंतर वेधशाळेला L1 बिंदूला वेढलेल्या विस्तृत प्रभामंडल कक्षेत नेईल. सुमारे चार महिन्यांचा कालावधी अपेक्षित असलेल्या मोहिमेत प्रक्षेपण ते L1पर्यंतचा संपूर्ण प्रवास आदित्य-L1 मोहिमेद्वारे सूर्याची गतीशीलता आणि वर्तणुकीबद्दल आपल्या ज्ञानात भर टाकणार आहे.