नवी दिल्ली - पंतप्रधान नरेंद्र मोदी यांनी शनिवारी गोव्यातील कोरोना योद्ध्यांशी संवाद साधला. व्हिडीओ कॉन्फरन्सिंगच्या माध्यमातून गोव्याच्या आरोग्य कर्मचाऱ्यांसोबत बोलताना त्यांनी काँग्रेसवर निशाणा साधला. पंतप्रधान मोदी म्हणाले की, शुक्रवारी रेकॉर्ड ब्रेक लसीकरण झाल्यानं एका पक्षाला ताप आला आहे. आता या राजकीय तापावर काही उपचार आहे का? पक्षाचे नेते लसीकरण विक्रमी झाल्यावरही प्रश्न उपस्थित करत आहेत. शुक्रवारी अडीच कोटी लसीचे डोस देण्यात आले. वाढदिवस येतील जातील पण १७ सप्टेंबर हा दिवस माझ्यासाठी स्पेशल आणि भावनिक करणारा होता असेही मोदी म्हणाले.

मी ऐकलं आहे की जेव्हा लसीकरण असतं तेव्हा जे लस घेतात त्यात १०० पैकी एखाद्याला रिअॅक्शन होते, ताप येतो. आणि असंही म्हटलं जातं की, खूप जास्त ताप आला तर मानसिक संतुलन बिघडतं. पण मी पहिल्यांदाच पाहतोय की अडीच कोटींहून अधिक लसीकरण झालं आणि काल रात्री १२ वाजल्यानंतर अचानक एका राजकीय पक्षाला रिअॅक्शन झाली. त्यांना ताप आला यामागे काही लॉजिक असू शकतं का असा प्रश्न उपस्थित डॉक्टरांना विचारत मोदींनी काँग्रेसला नाव न घेता खोचक टोला लगावला.

पंतप्रधान मोदींनी गोव्याच्या विकासासाठी मुख्यमंत्री प्रमोद सावंत यांचे आभार मानले. गोवा विकासकामांच्या बाबतीत आघाडीवर आहे. गोव्यातील प्रत्येक घरात आज वीज आणि पाणी पोहोचत आहे. तसंच ग्रामीण भागातही पाणी पोहोचत आहे. पर्यटन क्षेत्रात गोव्याची भूमिका महत्त्वाची आहे.

कोरोनाचा संसर्ग कमी झाल्यानं इथं पर्यटकांची संख्या वाढणार आहे. संसर्ग कमी झाला असला तरी धोक्यांकडे दुर्लक्ष करून चालणार नाही. कोरोनाच्या प्रोटोकॉलचं पालन करणं गरजेचं असल्याचं मोदी म्हणाले.