पंतप्रधान नरेंद्र मोदी सध्या फ्रान्स दौऱ्यावर आहेत. तर दुसरीकडे राजधानी दिल्लीमध्ये पावसाने धुमाकूळ घातला आहे. राजधानीत पूर परिस्थिती निर्माण झाली आहे. मोठ्या प्रमाणावर जनजीवन विस्कळीत झालं आहे. राजधानी दिल्लीत यमुना नदी धोक्याच्या पातळीपेक्षा 3 मीटरवर पोहोचली आहे. अशा परिस्थितीत अनेक भागात पुराचा धोका निर्माण झाला आहे.

अनेक भागांत रस्त्यांवर पाणी साचले असून मेट्रो सेवेवरही परिणाम झाला आहे. पुराच्या पार्श्वभूमीवर दिल्ली सरकारच्या मंत्र्यांनी मदत आणि उपाययोजनांचा आढावा घेतला. केजरीवाल यांनी केंद्र सरकारकडे मदतीचे आवाहनही केले आहे. (Latest Marathi News)

अशातच नरेंद्र मोदींनी थेट फ्रान्समधून फोन करुन केंद्रीय गृहमंत्री अमित शाह यांच्याकडून परिस्थितीचा आढावा घेतला आहे. फोनवरुन झालेल्या या चर्चेदरम्यान, अमित शाह यांनी पंतप्रधान नरेंद्र मोदींना सध्या नेमकी काय स्थिती आहे याची माहिती दिली आहे. तसंच यमुना नदीचं पाणी पुढील 24 तासात ओसरण्यास सुरुवात होईल असंही सांगितलं आहे.

त्याचबरोबर अमित शाह यांनी पुढील 24 तासांमध्ये दिल्लीतील पाणी ओसरण्यास सुरुवात होईल. संपुर्ण परिस्थितीवर राज्यपालांसह मी लक्ष ठेवून आहे अशी माहिती अमित शाह यांनी दिली आहे. तर पुराच्या पाण्यात अडकलेल्यांच्या मदत आणि बचावकार्यासाठी योग्य प्रमाणात एनडीआरएफ पथकं तैनात करण्यात आली आहे, याबाबतची माहितीही केंद्रीय गृहमंत्रालयाने मोदींना दिली आहे.(Latest Marathi News)

दिल्लीमध्ये पूरसदृश्य परिस्थितीमुळ जनजीवन मोठ्या प्रमाणावर विस्कळीत झालं आहे. यमुना नदीच्या पाण्याने धोक्याची पातळी ओलांडली असल्याने मोठा फटका बसला आहे. प्रशासनाने 16 जुलैपर्यंत शाळा आणि कॉलेज बंद ठेवण्याचे आदेश दिलेत.