केंद्रीय मंत्रिमंडळाच्या विविध समित्यांची घोषणा आज करण्यात आली. ‘एनडीए’तील घटक पक्ष संयुक्त जनता दल, तेलुगू देसम, धर्मनिरपेक्ष जनता दल (जेडीएस) आणि शिवसेना या पक्षांना मंत्रिमंडळ समित्यांमध्ये सामावून घेण्यात आले. तर, सरकारी नियुक्त्यांसाठी महत्त्वाच्या मानल्या जाणाऱ्या मंत्रिमंडळ समितीसह सर्व आठही समित्यांमध्ये समावेश असलेले गृहमंत्री अमित शहा हे एकमेव मंत्री आहेत. संरक्षण मंत्री राजनाथ सिंह यांचा सहा तर परिवहन मंत्री नितीन गडकरी यांचा चार समित्यांमध्ये समावेश करण्यात आला आहे.

नियुक्ती समिती, निवास व्यवस्था समिती, आर्थिक व्यवहार समिती, संसदीय व्यवहार समिती, राजकीय व्यवहार समिती, सुरक्षा समिती, गुंतवणूक आणि विकास समिती, कौशल्य रोजगार आणि उपजिविका समिती अशा आठ मंत्रिमंडळ समित्यांची घोषणा सरकारतर्फे करण्यात आली.

शासकीय निवासस्थानांचे वाटप करणाऱ्या निवास व्यवस्था समिती व संसदीय व्यवहार समिती व्यतिरिक्त उर्वरित सर्व समित्यांच्या अध्यक्षपदी पंतप्रधान मोदी असतील. तर निवास व्यवस्था समितीचे नेतृत्व गृहमंत्री अमित शहा आणि संसदीय व्यवहार समितीचे नेतृत्व संरक्षण मंत्री राजनाथसिंह यांच्याकडे असेल. सैन्यदलांच्या तिन्ही प्रमुखांच्या नियुक्तीसह रिझर्व्ह बॅंक, महाधिवक्ता, सचिव आणि सहसचिव दर्जाच्या अधिकाऱ्यांच्या नियुक्तीसोबतच सरकारच्या महत्त्वाच्या पदांवरील नियुक्तीचे अधिकार असलेल्या नियुक्ती समितीत पंतप्रधान नरेंद्र मोदी आणि गृहमंत्री अमित शहा या दोघांचाच समावेश करण्यात आला.

• सुरक्षा विषयक समिती : पंतप्रधान नरेंद्र मोदी, संरक्षणमंत्री राजनाथ सिंह, गृहमंत्री अमित शहा, अर्थमंत्री निर्मला सीतारामन आणि परराष्ट्र व्यवहार मंत्री

• एस. जयशंकर

• निवासस्थान व्यवस्थापन समिती : अमित शहा, नितीन गडकरी,

• निर्मला सीतारामन, मनोहरलाल खट्टर, पीयुष गोयल

• विशेष निमंत्रक : डॉ. जितेंद्र सिंह

• आर्थिक व्यवहार विषयक समिती: एच. डी. कुमारस्वामी, राजीव रंजन

• उर्फ लल्लन सिंह

• संसदीय व्यवहार समिती : राजीव रंजन उर्फ लल्लन सिंह, के. राममोहन नायडू.

• व्यवहार विषयक समिती : के. राममोहन नायडू, जितनराम मांझी

• गुंतवणूक आणि विकास समिती : चिराग पासवान

• विशेष निमंत्रक : प्रतापराव जाधव

• कौशल्य रोजगार व उपजिविका समितीचे विशेष निमंत्रित : जयंत चौधरी