श्रीनगर : विमान भाड्यातील वाढ ही काश्‍मीरमधील पर्यटनात अडथळा ठरत आहे. यामुळे पर्यटक हवाई प्रवास टाळून रस्ते मार्गाने येण्यास पसंती देत आहे. यावर्षी जानेवारी ते जून या सहा महिन्यांच्या कालावधीत १५.६५ लाख पर्यटकांनी भेट दिली आहे. यामध्ये २६ हजार परदेशी पर्यटक आहेत.

हिमाच्छादित डोंगर, आरस्पानी नद्या आणि निसर्गाचा आनंद घेण्यासाठी काश्‍मीरला येणाऱ्या पर्यटकांची गर्दी वाढतच आहे. यामुळे देशातील विविध ठिकाणांहून काश्मीरपर्यंतचे विमानाचे भाडे गगनाला भिडले असल्याने विमानप्रवासासह काश्मीरची सहल आवाक्याबाहेर आहे. अनेकांनी रस्ते मार्गाचा पर्याय अनेकजण निवडत आहेत, असे पर्यटन व्यावसायिकांनी सांगितले. विमानाच्या भाडेवाढीबरोबरच रस्त्यांची स्थितीही सुधारली असल्याने काश्‍मीरचे पर्यटक ‘रोड ट्रीप’चा आनंद घेतात, असे त्याने सांगितले.

पर्यटक कंपन्या आणि व्यावसायिकांकडेही मोटारी आणि बस प्रवासासाठी विचारणा होत आहे. ‘‘काश्‍मीरसाठी येण्यासाठी वाहनांची मागणी मोठ्या प्रमाणात वाढली आहे, असे संबंधित व्यावसायिकाने सांगितले. श्रीनगर-जम्मू रेल्वेसेवा सुरू झाल्यामुळे रस्ते मार्गाने येणाऱ्या पर्यटकांच्या संख्येत मोठी वाढ होण्याची अपेक्षा व्यावसायिकांना वाटत आहे.

‘‘काश्‍मीरच्या सहलीसाठी रस्ते वाहतुकीचा पर्याय निवडण्याचा कल वाढू लागला आहे. जम्मू ते श्रीनगर प्रवासासाठी वाहने आणि मोटारसायकली भाडेतत्त्वावर घेणाऱ्या पर्यटकांमध्ये वाढ झाली आहे,’’ असे पर्यटन व्यावसायिक कुथू यांनी सांगितले. काश्‍मीरमध्ये रस्त्यांवरून फिरण्याची मजा पर्यटक घेत आहे. हा पर्याय त्यांना किफायतशीर वाटतो आणि भारताचे नंदनवन पाहण्याचे त्यांचे स्वप्न पूर्ण होत आहे.

या वर्षी विमानाचे तिकीट दर जास्त असल्याने आम्ही वाहनाने काश्मीरला जाण्याचा निर्णय घेतला. पैशाचा विचार करता विमानापेक्षा रस्ते वाहतूक परवडणारी तर आहेच शिवाय साहसीही आहे. यामुळे मार्गावरील सुंदर ग्रामीण भागही पाहता आला.

- प्रिया सिंग, पर्यटक, पंजाब