नवी दिल्ली : राष्ट्रपतिपदाच्या निवडणुकीत भाजप आघाडीच्या उमेदवार द्राउपदी मुर्मु यांच्या विजयात महाराष्ट्राने ठळक वाटा उचलल्याचे स्पष्ट झाले आहे. मुर्मु यांना महाराष्ट्र विधानसभेतून तब्बल 181 मते मिळाली तर त्यांचे प्रतिस्पर्धी यशवंत सिन्हा यांना 98 मते मिळाली. या निवडणुकीत राज्यातून 283 आमदारांनी मतदान केले होते. यांना 3 लाख 16 हजार 75 तर सिन्हा यांना एक लाख 71 हजार पन्नास इतके मतमूल्य मिळाल्याचे दिसत आहे. शिवसेनेने या निवडणुकीत मुर्मू यांना पाठिंबा दिला होता. राज्यसभा सचिवालयाच्या सुत्रांनी आज रात्री सकाळ ला दिलेल्या प्रारंभिक माहितीनुसार मुरगूड यांना 181 मते मिळाली.

मुख्यमंत्री एकनाथ शिंदे यांनी विधानसभेत विश्वासदर्शक ठरावावर भाषण करताना 2024 मध्ये शिवसेना म्हणजेच आपला गट आणि भाजपा मिळून विधानसभेत 200 जागा मिळतील असा जो विश्वास व्यक्त केला होता, सार्थ करणारा पहिला आकडा राष्ट्रपतीपदाच्या मतदानातून समोर आल्याचे जाणकार मानतात. महाराष्ट्र विधानसभेत 288 आमदार आहेत. प्रारंभिक माहितीनुसार जो आकडा समोर येतो त्यानुसार मतदान केलेल्या आमदारांची संख्या 279 इतकी होते. भाजप व विरोधकांचे काही आमदार मतदानास उपस्थित राहू शकले नव्हते, या परिस्थितीत उर्वरित नऊ आमदारांची मते बाद झाली का , हे चित्र अद्याप स्पष्ट झालेले नाही.