सध्या देशात राष्ट्रपती निवडणुकीचे मतदान १८ जुलैला होणार आहे. राष्ट्रपती निवडण्याची प्रक्रिया निवडणूक आयोगाने सुरु केली आहे. यासाठी केंद्रातील भाजप सरकार आणि देशातील इतर विरोधी पक्षांनी निवडणुकीसाठी कंबर कसली आहे. २१ जुलै रोजी राष्ट्रपतींच्या नावाची घोषणा केली जाणार असून यासाठी मोर्चेबांधणीने वेग घेतला आहे.

राष्ट्रपतिपदाच्या आगामी निवडणुकीत विविध राजकीय पक्षांशी चर्चा करण्यासाठी भाजपकडून जगतप्रसाद नड्डा आणि राजनाथ सिंह हे नेते यांच्या नावांची घोषणा करण्यात आली आहे. त्यामुळे या दोन दिग्गज नेत्यांवर भाजपाने मोठी जबाबदारी टाकली आहे. सध्याच्या राजकीय गणितानुसार भाजप जो कोणी उमेदवार देईल, तो राष्ट्रपतीपदाच्या निवडणुकीत सहज विजयी होईल, असे चित्र आहे.

सध्या संपूर्ण देशाचे लक्ष हे भाजपच्या राष्ट्रपतीपदाच्या उमेदवाराच्या घोषणेकडे लागले आहे. २०१७ मध्ये पंतप्रधान नरेंद्र मोदी यांनी राष्ट्रपतीपदाच्या निवडणुकीत भाजपचे उमेदवार म्हणून रामनाथ कोविंद यांचे नाव जाहीर केले आहे. कोविंद यांना राष्ट्रपतीपदी विजयी करून भाजपने देशभरातील दलित समुदायाला संदेश दिला होता. सध्या 'आझादी का अमृत महोत्सव' सुरू असताना भाजप आदिवासी समाजातील व्यक्तीला राष्ट्रपतीपदाची उमेदवारी देऊ शकतो, अशी चर्चा आहे.

दरम्यान, पुढील आठवड्यात भाजपच्या संसदीय मंडळाची बैठक होण्याची शक्यता आहे. त्यानंतरच भाजपकडून राष्ट्रपतीपदाच्या उमेदवाराची घोषणा केली जाण्याची शक्यता आहे. या बैठकीतच राष्ट्रपती आणि उपराष्ट्रपतीपदाच्या उमेदवारांच्या नावांची चर्चा होण्याची शक्यता आहे. मात्र, उपराष्ट्रपतीपदाची निवडणूक जाहीर झाल्यानंतरच भाजप त्या उमेदवाराची घोषणा करणार आहे.