नवी दिल्ली : काशीचा कायापालट करणाऱ्या बाबा विश्वनाथ धाम कॉरीडॉरच्या लोकार्पणाचा भव्य सोहळा झाल्यानंतर पंतप्रधान नरेंद्र मोदी येत्या शनिवारी (ता. १८) पुन्हा उत्तर प्रदेशात येतील. गंगा एक्सप्रेस वे या आणखी एका महत्त्वाकांक्षी प्रकल्पाचा कोनशिला समारंभ शहाजहानपूर येथे त्यांच्याहस्ते होईल. दिल्ली-मुंबई द्रुतगती मार्गानंतर हा देशातील सर्वाधिक अंतराबाबत दुसऱ्या क्रमांकाचा द्रुतगती मार्ग ठरेल.राज्याच्या पूर्व आणि पश्चिम टोकांना जोडण्यासाठी हा प्रकल्प उभारण्यात येईल. मेरठ ते प्रयागराज हा ५९४ किलोमीटरचा टप्पा असेल. दुसऱ्या टप्प्यात उत्तराखंडच्या सीमेपर्यंत मार्ग जोडण्यात येईल. प्रकल्पाच्या अंतर्गत शहाजहानपूर जिल्ह्यात हवाई धावपट्टी बांधण्यात येईल. आणीबाणीची परिस्थिती तसेच हवाई दलाच्या विमानांसाठी तिचा वापर केला जाईल.

पंतप्रधान कार्यालयाने जारी केलेल्या निवेदनानुसार कोरोनाचा कहर सुरु असतानाही भूसंपादन प्रक्रिया ठप्प झाली नाही.

प्रकल्पाची वैशिष्ट्ये

• ५९४ किमी अंतर

• ९ सार्वजनिक सुविधा केंद्रे

• ३८१ भुयारी मार्ग

• १४ मोठे पूल

• ३६२३० कोटी खर्च

• ७ रेल्वे उड्डाणपूल

• १२६ लहान पूल

• १८,५५,००० मार्गालगत झाडे लावणार