नवी दिल्ली : सुधारित तीन कृषी कायद्यांविरोधात देशातील शेतकरी संतप्त आहेत. दिल्लीच्या सीमेवर आंदोलन उभारुन देखील मोदी सरकारने हे कायदे मागे घेतलेले नाहीयेत. हे कायदे काळे असून याचा शेतकऱ्यांना फायदा न होता भांडवलदारांनाच होणार असल्याचा आरोप आंदोलकांचा आहे. म्हणूनच, नव्या कृषी कायद्यांविरोधात गेल्या सहा महिन्यांपासून हजारोंच्या संख्येने शेतकरी दिल्लीच्या सीमेवर आंदोलन करत आहेत.

या कायद्यांवरुन आंदोलक शेतकरी आणि केंद्र सरकारच्या दरम्यान चर्चेच्या अनेक फेऱ्या पार पडल्या आहेत. मात्र तरिही समाधानकारक असा तोडगा निघाला नाहीये. त्यातच कोरोनाची दुसरी लाट आली. मात्र, हे आंदोलन आजही सुरुच आहे. हे आंदोलन आणखी किती दिवस सुरु राहणार, याबाबत काहीच स्पष्टता नाहीये. उन, पाऊस, थंडी, वारा आणि कोरोना अशा सगळ्या संकटात हे शेतकरी आपल्या मागण्यांवर ठामपणे उभे राहिले आहेत. या आंदोलनात आतापर्यंत अनेक आंदोलकांनी आपला जीव गमावला आहे.

शेतकरी आंदोलनाचे सहा महिने पूर्ण करणं तितकसं सोपं नव्हतं. मोदी सरकारच्या अहंकारी आणि निर्दयी वागणुकीमुळे या आंदोलनात आतापर्यंत 500 हून अधिक आंदोलकांचा मृत्यू झाला आहे. मात्र, हे आंदोलक शेतकरी आपला होऊपर्यंत ठामपणे उभे राहितील. #500DeathsAtFarmersProtest अशा आशयाचे ट्विट किसान एकता मोर्चाच्या ट्विटर हँडलवरुन करण्यात आलं आहे.

याला काँग्रेसचे अध्यक्ष राहुल गांधी यांनी आपला पाठिंबा दर्शवला आहे. राहुल गांधी यांनी वेळोवेळी या आंदोलनाला आपला पाठिंबा दर्शवला आहे. त्यांनी पंजाब आणि हरियाणा या राज्यांमध्ये ट्रॅक्टर रॅली काढून सरकारविरोधातील शेतकऱ्यांच्या या मागणीला कृतीशील पाठिंबा दाखवला आहे. ते सातत्याने शेतकऱ्यांची बाजू मांडत असतात. याच संदर्भात आता राहुल गांधी यांनी ट्विट करत पुन्हा एकदा शेतकऱ्यांना आपला पाठिंबा दिला आहे. त्यांनी म्हटलंय की, शेती आणि देशाच्या सुरक्षेसाठी शेतकऱ्यांनी सातत्याने आपले प्राण गमावले आहेत. मात्र, शेतकरी घाबरले नाहीयेत. ते आजही तितक्याच ठामपणे खरेपणाने उभे आहेत.