नवी दिल्ली - काँग्रेस नेते राहुल गांधी सातत्याने उद्योगपती गौतम अदानी यांच्यावर टीका करत आहेत. शनिवारी सकाळी राहुल गांधी यांनी ट्विट करून गौतम अदानींवर निशाणा साधला. पण त्याचबरोबर काँग्रेस सोडून भाजपमध्ये प्रवेश केलेल्या नेत्यांवरही त्यांनी निशाणा साधला.

राहुल गांधी यांनी एक फोटो शेअर केला होता, ज्यावर स्पष्ट शब्दात 'अदानी' लिहिले होते. पण त्यासोबतच काँग्रेसच्या पाच माजी नेत्यांची नावे त्यात होती.

राहुल गांधी यांनी शेअर केलेल्या फोटोवर गुलाम, सिंधिया, किरण, हिमंत आणि अनिल असे लिहिले होते. हे पाचही नेते आधी काँग्रेसमध्ये होते. मात्र यातील चौघांनी आता भाजपमध्ये प्रवेश केला आहे. गुलाम नबी आझाद यांनी स्वत:चा पक्ष स्थापन केला आहे. राहुल गांधी यांनी हा फोटो ट्विट करत लिहिले की, "सत्य लपवतात, म्हणून दररोज भटकवतात. पण प्रश्न एकच आहे - अदानींच्या कंपन्यांमधील २० हजार कोटी रुपये कोणाचे?

राहुल गांधी यांनी शेअर केलेल्या फोटोत आपलं नाव पाहून हिमंत बिस्वा शर्मा संतापले. बोफोर्स आणि नॅशनल हेराल्ड घोटाळ्यातील रक्कम तुम्ही कुठे लपवली, हे आम्ही तुम्हाला कधीच विचारले नाही. तसेच, तुम्ही ओटावियो क्वात्रोचीला अनेकवेळा भारतीय न्यायव्यवस्थेच्या तावडीतून कसे सुटू दिले? हेही विचारलं नाही. पण आता आपण कोर्टात भेटू, असा सूचक इशाराही शर्मा यांनी दिला.