मनसे अध्यक्ष राज ठाकरे यांचा अयोध्या दौरा गेल्या काही दिवसांपासून चांगलाच चर्चेत होता. मात्र हा दौरा स्थगित झाल्याची घोषणा राज ठाकरेंनी केली आणि त्यांच्यावर टीकेची झोड उठली. अयोध्या दौरा स्थगित कशाला करायचा? आम्ही मदत केली असती, असा टोला संजय राऊत यांनी लगावला आहे. तर अयोध्या दौऱ्याला तीव्र विरोध करणारे खासदार बृजभूषण सिंह यांनीही या दौऱ्याच्या स्थगितीवर प्रतिक्रिया दिली आहे. (Brijbhushan Singh on Raj Thackeray Ayodhya visit)

उत्तर प्रदेशचे भाजपा खासदार हे राज ठाकरेंच्या अयोध्या दौऱ्याची घोषणा झाल्यापासूनच त्यांना विरोध करत होते. उत्तर भारतीयांची माफी मागितल्याशिवाय अयोध्येत प्रवेश करू देणार नाही, अशी भूमिका बृजभूषण यांनी घेतली होती. आता हा दौरा स्थगित झाल्यानंतर बृजभूषण म्हणाले की, माफी न मागणाऱ्या राज ठाकरेंनी जुन्या जखमा ताज्या केल्या आहेत. राज ठाकरे दुर्दैवी व्यक्ती आहेत. त्यांच्याकडे एक संधी होती, तीही हुकली. त्यांनी इथल्या जनतेची, योगींची, मोदींची माफी मागितली असती तर उत्तर प्रदेशच्या लोकांचा राग कमी झाला असता. माफी न मागता त्यांनी जुनी जखम पुन्हा ताजी केली आहे. म्हणूनच मी ठरवलं आहे की माझा कोणताही कार्यक्रम स्थगित होणार नाही.

राज ठाकरे ५ जून रोजी अयोध्या दौऱ्यावर जाणार होते. मात्र आज सकाळी त्यांनी हा दौरा स्थगित केल्याची माहिती दिली आहे. यामागे राज ठाकरे यांच्या प्रकृतीचं कारण असल्याचं मनसे समर्थकांचं म्हणणं आहे. राज ठाकरे यांच्या पायाचं दुखणं पुन्हा उफाळून आलं असून त्यांच्या पायावर शस्त्रक्रिया करणं आवश्यक आहे. ही शस्त्रक्रिया पुण्यातल्या सभेनंतर होणार असल्याची माहितीही मनसैनिकांनी दिली आहे. मात्र अधिकृतरित्या कोणतंही कारण समोर आलेलं नाही. पुण्यात २२ मे रोजी होणाऱ्या या सभेमध्ये याबाबतचा खुलासा होणार आहे.