नवी दिल्ली- हिवाळी अधिवेशनात निलंबित झालेले खासदार संसद परिसरात आंदोलन करत आहेत. यावेळी टीएमसी खासदार कल्याण बॅनर्जी यांनी राज्यसभा अध्यक्ष जगदीप धनकर यांची मिमिक्री केली. यावरुन उपराष्ट्रपती भडकल्याचं पाहायलं मिळालं. (Rajya Sabha Chairman Jagdeep Dhankhar criticised Trinamool MP Kalyan Banerjee mimicry of him which was filmed by Congress MP Rahul Gandhi)

उपराष्ट्रपतींनी या प्रकाराला लज्जास्पद म्हटलं आहे. हा सर्व प्रकार अस्वीकार्य आहे की एक खासदार खिल्ली उडवत आहे आणि दुसरा खासदार त्याचा व्हिडिओ बनवत आहे. राज्यसभा अध्यक्ष म्हणाले की, पातळी सोडण्याची काही मर्यादा असते. मी एक व्हिडिओ पाहिला. त्यात एक खासदार माझी नक्कल करत आहेत. दुसरा त्याचा व्हिडिओ करत आहे. त्यांना सदबुद्धी देवो. काही ठिकाणांना तरी सोडा.

राज्यसभेतील कामकाजादरम्यान जगदीप धनखड यांनी केलेल्या कृतीची नक्कल कल्याण बॅनर्जी यांनी करुन दाखवली. यावेळी त्यांच्या शेजारी अनेक खासदार उपस्थित होते. राहुल गांधी देखील त्या ठिकाणी उपस्थित होते. कल्याण बॅनर्जी यांच्या कृतीला इतर खासदार दाद देत असल्याचं व्हिडिओमध्ये दिसत आहे.

कायदा आणि न्याय मंत्री अर्जुन राम मेघवाल यांनीही या प्रकाराचा निषेध केलाय. कल्याण बॅनर्जी यांनी संसदेची प्रतिष्ठा आणि पदाचा अपमान केलाय, असं ते म्हणाले. दरम्यान, लोकसभेतून आज ४९ खासदारांचे निलंबन करण्यात आले आहे. त्याविरोधात खासदार संसदेच्या परिसरात आंदोलन करत आहेत.

संसदेतील सुरक्षा भेद प्रकरणी विरोधक आक्रमक झाले आहेत. केंद्रीय गृहमंत्री अमित शाह यांनी संसदेत यावरुन निवेदन द्यावं अशी विरोधकांची मागणी आहे. पण, असं होत नसल्याने विरोधकांनी सभागृहात गोंधळ घातला. त्यानंतर निलंबनांचं शस्त्र पुढे करण्यात आलं आहे. सोमवारी ९२ खासदारांचं निलंबन झालं होतं. आज आणखी ४९ खासदारांचे निलंबन झालंय. (Latest Marathi News)