राज्यसभेत दोन महिला खासदारांनी मराठीतून भाषणे दिली. भाजपच्या खासदार मेधा कुलकर्णी यांनी महाराष्ट्राला मिळालेल्या निधीचा पाढा वाचला तर काँग्रेसच्या रजनी पाटील यांनी महाराष्ट्र आत्महत्यांमध्ये पहिल्या क्रमांकांवर असल्याचे सांगून प्रत्युत्तर दिले.

राज्यसभेत आज अर्थसंकल्पावर चर्चा सुरू असताना महाराष्ट्रातील दोन महिला खासदारांनी आपआपल्या पक्षाची जोरदार भूमिका मांडली. मेधा कुलकर्णी यांचे अर्थसंकल्पावरील पहिलेच भाषण होते. त्यांनी मराठीतून सुरूवात करून केंद्र सरकारने महाराष्ट्राला दिलेल्या निधीचा आलेख वाचून दाखविला. अर्थमंत्री निर्मला सीतारामन यांनी सादर केलेला अर्थसंकल्पात महाराष्ट्रासाठी अनेक तरतुदी केल्या असून महाराष्ट्रावर निधीमध्ये अन्याय केल्याचा आरोप फेटाळून लावला.

महाराष्ट्रातील पायाभूत सुविधा, रेल्वेच्या विकासासाठी ऐतिहासिक तरतूद केल्याचा दावा खासदार कुलकर्णी यांनी केला. महाराष्ट्राच्या विकासासाठी ६ लाख कोटी रुपयांची तरतूद करण्यात आली आहे. काँग्रेसने यूपीएच्या काळात केवळ १ हजार कोटी रेल्वेच्या विकासासाठी मिळाले होते. यावर्षी मात्र १५ हजारावर कोटी मिळाल्याचेही खासदार मेधा कुलकर्णी यांनी सांगितले. परंतु काँग्रेसच्या खासदारांना काविळ झाली आहे. त्यांना केवळ पिवळे दिसत आहे. हे लोक औरंगजेब फॅन क्लबचे सदस्य असल्याचे खासदार कुलकर्णी म्हणाल्या.

मेधा कुलकर्णी यांच्या भाषणाला टीएमसीच्या काही सदस्यांनी आक्षेप घेतला व यावेळी राष्ट्रवादी काँग्रेसचे प्रफुल्ल पटेल बोलायला उभे राहिले. यामुळे सभागृहात काहीवेळ गोंधळ निर्माण झाला होता. पीठासीन अधिकारी प्रियांका चतुर्वेदी या वारंवार खासदार प्रफुल्ल पटेल यांना बसायला सांगत होत्या.