Ayodhya Ram Mandir: अयोध्येत २२ जानेवारीला श्री राम मंदिराचे उद्घाटन होणार आहे. सर्व तयारी शेवटच्या टप्प्यात आहेत. राम मंदिराचे उद्घाटनानंतर अयोध्या देशात पर्यटन स्थळ म्हणून विकसीत होणार आहे. त्यामुळे याचा संपूर्ण देशाला फायदा होणार आहे. जानेवारीत हा कार्यक्रम पूर्ण झाल्यानंतर ५० हजार कोटींहून अधिक कमाई होणार आहे.

कॉन्फेडरेशन ऑफ ऑल इंडिया ट्रेडर्स (CAIT) चे राष्ट्रीय सरचिटणीस प्रवीण खंडेलवाल यांच्या माहितीनुसार, देशातील सर्व बाजारपेठांमध्ये श्री राम ध्वज, श्री राम अंगवस्त्र, लॉकेट्स, चावी चेन, राम दरबाराच्या चित्रांसह श्रीरामाचे चित्र असलेल्या हारांचा मोठा साठा आहे. राम मंदिराच्या मॉडेलची चित्रे, सजावटीचे पेंडेंट आणि बांगड्यांसह अनेक वस्तू विक्रीसाठी उपलब्ध आहेत. त्यातही राम मंदिराच्या मॉडेलला मोठ्या प्रमाणात मागणी असून हे मॉडेल हार्डबोर्ड, पाइनवुड, लाकूड इत्यादीपासून वेगवेगळ्या आकारात बनवले जात आहेत. (Ayodhya Ram Mandir)

हे मॉडेल बनवून मोठ्या प्रमाणात महिलांना रोजगार मिळत आहे. सर्व राज्यांमध्ये स्थानिक कारागीर, कलाकार आणि हातकाम करणाऱ्यांचाही मोठा व्यवसाय होत आहे. श्री राम मंदिराचा हा दिवस देशात व्यवसायासोबतच रोजगाराच्या नवीन संधी निर्माण करत आहे. मोठ्या प्रमाणात कुर्ते, टी-शर्ट आणि इतर कपडे देखील तयार केले जात आहेत.  विशेष म्हणजे कुर्ते बनवताना मुळात खादीचा वापर होतो.

22 जानेवारी रोजी देशभरात दिवाळी साजरी करण्याचे आवाहन पाहता मातीचे दिवे, रांगोळी काढण्यासाठी विविध रंग, फुलांच्या सजावटीसाठी फुले आणि बाजारपेठा आणि घरे उजळण्यासाठी विजेचे दिवे मिळण्याची शक्यता आहे. याशिवाय रस्त्यांवर लावण्यात आलेल्या होर्डिंग्ज, पोस्टर, बॅनर, पत्रक, इतर साहित्य, स्टिकर्स आदींसह प्रचार साहित्याचाही मोठा व्यापार होणार आहे, अशी माहिती प्रवीण खंडेलवाल यांनी दिली. (Latest Marathi News)