डेहराडून: उत्तराखंडमध्ये अनेक भागांत मुसळधार पावसामुळे नद्या ओसंडून वाहत आहेत. बऱ्याच नद्यांना पूरही आले आहेत. गुरुवारी सकाळच्या सुमारास जाखान नदीवरील पूल खचल्याने भीषण अपघात घडला आहे. पूलावरून जाणारी वाहने नदीत पडली आहेत. राणीपोखरी ते ऋषीकेश महामार्गावर हा पूल आहे. सध्या या मार्गावरील सर्व वाहतूक पर्यायी मार्गाने वळवली असल्याची माहिती जिल्हाधिकाऱ्यांनी दिली आहे. हा पूल पडल्याने ऋषीकेष ते देहराडूनचा संपर्क तुटला आहे.

अपघातानंतर तत्काळ घटनास्थळी पोलिस पोचल्याने त्यांनी मदतकार्य सुरू केले होते. नदीतील पाण्याचा वाढता प्रवाह आणि त्याच्य वेगामुळे पूलाचा हा भाग पडल्याची माहिती स्थानिक पोलिसांनी दिली. पूलाखाली अडकलेल्या गाड्या काढण्याची मोहिम सुरू असल्याचेही पोलिसांनी सांगितले. प्रशासनाच्या माहितीनुसार हा पूल १९६४ साली बांधला आहे.