नवी दिल्ली : कोरोना व्हायरसच्या महासाथी दरम्यान कोरोनाच्या दोन लाटांचा सामना करणारी देशाची अर्थव्यवस्था आता हळूहळू रुळावर येत आहे. आज मंगळवारी राष्ट्रीय सांख्यिकी कार्यालयाने सकल घरेलू उत्पादन अर्थात जीडीपीचे नवे आकडे जाहीर केले आहेत. सध्याच्या आर्थिक वर्षांत २०२१-२२ च्या पहिल्या तिमाहीमध्ये म्हणजेच एप्रिल-जूनच्या आकडेवारीनुसार, जीडीपी विकास दर २०.१ टक्के राहिला आहे. हे आकडे चीनपेक्षाही उत्तम आहेत. कारण पहिल्या तिमाहीमध्ये चीनचा विकास दर ७.९ टक्के नोंदवला गेला होता.

जीडीपीचे आकडे कोणत्याही देशाची आर्थिक स्थिती दर्शवत असतात. गेल्या आर्थिक वर्षाच्या पहिल्या तिमाहीत देशाचा जीडीपी वजा २४.४ टक्क्यांनी घसरला होता. जीडीपीची वाढ मोजण्यासाठी या आधीच्या वर्षातील कालवधीची तुलना केली जाते. गेल्या वर्षी करोना संकटामुळे अनेक उद्योगधंदे बंद असल्याने जीडीपी घसरण नोंदवण्यात आली होती.

गेल्या वर्षी देश कोरोनाच्या पहिल्या लाटेचा सामना करत होता, तेंव्हा भारतात जगातील सर्वांत मोठा आणि कडक लॉकडाऊन लावण्यात आला होता. त्यामुळेच गेल्या आर्थिक वर्षांत २०२०-२१ च्या पहिल्या तिमाहीमध्ये विकास दर नकारात्मक झाला होता. तेंव्हा हा आकडा -२४.४ टक्के नोंदवण्यात आला होता.

असे बदलले आकडे

• आर्थिक वर्ष २०२०-२१ च्या पहिल्या तिमाहीमध्ये -२४.४ टक्के

• २०२०-२१ च्या दुसऱ्या तिमाहीत -७.४ टक्के

• तिसऱ्या तिमाहीत अर्थव्यवस्था निगेटीव्ह ग्रोथमधून बाहेर आली. विकासदर ०.५ टक्के नोंदवला गेला.

• गेल्या आर्थिक वर्षाच्या चौथ्या तिमाहीत १.६ टक्के नोंदवला गेला.

• सध्याच्या आर्थिक वर्षांच्या २०२१-२२ च्या पहिल्या तिमाहित म्हणजेच एप्रिल-जूनमध्ये तो वाढून २०.१ टक्के झाला आहे.