नवी दिल्ली : 'कोरोनिल' हे कोरोना आजार बरा करणारं औषध असल्याचा दावा योगगुरु बाबा रामदेव यांनी केला होता. याविरोधात आयएमए या डॉक्टरांच्या संघटनेनं दिल्ली हायकोर्टात धाव घेतली होती. यावर सोमवारी सुनावणी पार पडली. यावेळी हायकोर्टानं रामदेव यांना झटका देत हा दावा त्यांनी मागे घ्यावा, असे आदेश दिले आहेत.

दिल्ली हायकोर्टानं रामदेव यांना आदेश दिले की, त्यांनी कोरोनामुळं होणाऱ्या मृत्यूंसाठी अॅलोपॅथी औषधांना दोषी ठरवल्याचा दावा मागे घ्यावा तसेच कोरोनिल हे कोरोनावरील प्रभावी औषध असल्याचा केलेला दावा मागे घ्यावा. त्याचबरोबर सोशल मीडियावर याबाबत केलेले ट्विट्स त्यांनी तीन दिवसांत डिलीट करावेत, असे निर्देशही हायकोर्टानं दिले आहेत.

बाबा रामदेव तसेच त्यांचे सहकारी आचार्य बालकृष्ण आणि कंपनी पतंजली आयुर्वेद यांच्याविरोधात डॉक्टरांच्या संघटनेनं याचिका दाखल केली होती. रामदेव यांच्याकडून कोरोनिल या औषधाची विक्री वाढवण्यासाठी चुकीची मोहिम राबवण्यात आली. त्यानुसार, कोरोनिल हे कोरोना महामारीवरील एक औषध असल्याचा दावा करण्यात आला होता. असा आरोप या याचिकेत करण्यात आला आहे.

दरम्यान, २७ ऑक्टोबर २०२१ला कोर्टानं बाबा रामदेवसह इतरांना समन्स बजावलं होतं. तर न्या. एजे भंभानी यांच्या खंडपीठानं २१ मे रोजी या प्रकरणावर सुनावणी घेत निर्णय राखून ठेवला होता.