तिरुअनंतपुरम: केरळचे मुख्यमंत्री पिनाराई विजयन यांनी राष्ट्रीय स्वयंसेवक संघ (आरएसएस) मुस्लिम आणि ख्रिश्चनांना 'देशाचे शत्रू' मानत असल्याचा आरोप केला. तसेच जातीय भेदभाव आणि धार्मिक द्वेष पसरविणाऱ्यांविरोधात एकत्र यावं, अस आवाहनही विजयन यांनी केलं.

दुसरीकडे विजयन यांच्या या विधानावर भाजपने संतप्त प्रतिक्रिया दिली आहे. विजनय म्हणाले की, जातीय भेदभाव आणि धार्मिक द्वेषाविरुद्ध लढण्यासाठी संविधान हे सर्वोत्तम शस्त्र आहे. मात्र संविधानावरच आता हल्ला होतोय, असंही ते म्हणाले.

भारताला हिंदु राष्ट्र बनविणे हे आपले उद्दिष्ट असल्याचं राष्ट्रीय स्वयंसेवक संघाने आधीच स्पष्ट केले आहे. तसेच केंद्रातील सत्ताधारी पक्ष जी विचारधारा मानतो, त्या विचारधारेचा स्वातंत्र्यलढ्यात काहीही सहभागी नव्हता, असंही विजयन यांनी म्हटलं.

पंतप्रधान मोदींवरील गुजरात दंगलीवरील बीबीसीची वादग्रस्त डॉक्युमेंटरी डाव्या स्टुडंट फेडरेशन ऑफ इंडिया (एसएफआय) सह विविध राजकीय संघटनांनी केरळमध्ये दाखवली आहे. याचा भाजपच्या युवा मोर्चाने निषेध केला. काँग्रेसचे ज्येष्ठ नेते आणि केरळचे माजी मुख्यमंत्री ए. के. अँटनी यांचे चिरंजीव अनिल अँटनी यांनी या माहितीपटाच्या प्रदर्शनाविरोधात नाराजी व्यक्त केल्याने भाजपला अनपेक्षितपणे अनेक स्तरातून पाठिंबा मिळाला आहे.