मल्हारपेठ : पाकिस्तानी इंटेलिजन्सच्या (Pakistani Intelligence) हस्तकांना ओटीपी (वन टाइम पासवर्ड) शेअर केल्याच्या घोटाळ्यात कथित सहभागाबद्दल अटक केलेला पुण्यातील सॉफ्टवेअर इंजिनिअर अभिजित संजय जंबुरे हा मूळचा विहे (ता. पाटण) येथील आहे.

दरम्यान, अटकेच्या या वृत्ताने तालुक्यात (Vihe Patan) खळबळ उडाली आहे. अभिजित जंबुरे (Abhijit Jambure) हा पुण्यातील एका सॉफ्टवेअर कंपनीत इंजिनिअर (Software Engineer) म्हणून काम करत होता. तो ओटीपी विक्री आणि शेअरिंग घोटाळ्यात त्याचा सहभाग होता, असा संशय आहे.

पाटण तालुक्यातील विहे हे त्याचे मूळ गाव असून, गेल्या महिन्यामध्ये तो गावी आला होता. त्याने गावात नवीन दुमजली बंगला बांधला आहे. दरम्यान, अभिजित यास ओडिशा पोलिसांच्या स्पेशल टास्क फोर्सने पुणे येथे अटक केली असून, पुणे न्यायालयातून त्यास तीन दिवसांची ट्रान्झिट रिमांड मिळाल्यानंतर त्याला ओडिशामधील भुवनेश्‍वर येथे नेण्यात आले.

अभिजित याने गुजरातमधील आनंद येथील विद्यापीठातून पदव्युत्तर शिक्षण घेतले. त्यानंतर तो पुण्यातील एका सॉफ्टवेअर कंपनीत होता. मल्हारपेठ पोलिस ठाण्याचे सहायक पोलिस निरीक्षक उत्तम भापकर व त्यांच्या पथकाने बुधवारी विहेतील अभिजित याच्या घरी जाऊन माहिती घेतली.

दरम्यान, याबाबत सहायक पोलिसांशी संपर्क केला असता आम्हाला वरिष्ठांकडून अद्याप कोणत्याही प्रकारची चौकशी करण्याचे आदेश नाहीत. तो विहेतील असल्याचे समजल्याने आम्ही विहे येथे जाऊन माहिती घेतली असल्याचे त्यांनी सांगितले.