बंगळूर : सेंट्रल क्राईम ब्रँच (CCB) पोलिसांनी हिंदुत्ववादी कार्यकर्त्या चैत्रा कुंदापूर (Chaitra Kundapur) हिला बैंदूर विधानसभा मतदारसंघासाठी (Byndoor Assembly Constituency) भाजपचे तिकीट मिळवून देण्याचे आश्वासन देऊन एका व्यावसायिकाची फसवणूक केल्याच्या आरोपाखाली अटक केली आहे.

बंगळुरमधील उद्योजक बैंदूरचे मूळ रहिवासी असलेले भाजपचे इच्छुक गोविंदा बाबू पुजारी यांच्याकडून चैत्रा आणि इतर सात जणांनी पाच कोटी रुपये घेतले होते. चैत्राला १२ सप्टेंबरला उडुपी कृष्ण मठाजवळ अटक केली होती. बंगळुरचे पोलिस उपायुक्त (गुन्हे) अब्दुल अहद यांनी सांगितले की, इतर सहा संशयितांनाही सीसीबीने अटक केली आहे.

आठ सप्टेंबर रोजी बंगळूरमधील बांदेपाळ्य पोलिसांकडे पुजारी यांनी तक्रार केली. २०२२ मध्ये भाजप कार्यकर्ता प्रसाद बैंदूर (आरोपी क्रमांक ८) याने चैत्रा कुंदापुरा हिच्याशी त्यांची ओळख करुन दिली. पुजारी यांना चिक्कमगळूर येथील भाजप युवा मोर्चाचे सरचिटणीस गगन कदूर (आरोपी क्रमांक २) यांच्या संपर्कात आणले.

ते चार जुलै २०२२ रोजी चिक्कमगळूर येथे कदूर यांना भेटले. कदूर यांनी त्यांची ‘विश्वनाथजी’ नावाच्या व्यक्तीशी ओळख करून दिली. चैत्रा आणि इतरांनी त्यांची ओळख होस्पेट येथील हिरेहडगली येथील संस्थान मठातील अभिनव हलश्री स्वामीजी यांच्याशी करून दिली. स्वामीजीने आश्वासन देऊन दीड कोटी घेतले.

२३ ऑक्टोबर रोजी ते बंगळूरमध्ये ‘नाईक’ (आरोपी क्रमांक ५) म्हणून ओळखल्या जाणाऱ्या एका व्यक्तीला भेटले आणि भाजपच्या केंद्रीय निवडणूक समितीचा सदस्य असल्याचा दावा केला. ‘नाईक’ याने पुजारी यांना तिकीट देण्याचे आश्‍वान दिले. नाईक यांने २९ ऑक्टोबर २०२२ रोजी उर्वरित तीन कोटी घेतले.