दिल्लीमध्येच काही दिवसांपूर्वी श्रद्धा वालेकर या मुंबईतल्या तरुणीच्या खून प्रकरणाने देशभरात खळबळ माजवली. तिचाच प्रियकर आफताब पुनावाला याने तिच्या मृतदेहाचे ३५ तुकडे करून ते जंगलात टाकले आहेत. ही घटना ताजी असतानाच दिल्लीमध्ये अशीच एक घटना समोर आली आहे.

दिल्ली पोलिसांच्या गुन्हे शाखेने पूर्व दिल्लीत सापडलेल्या मानवी शरीराच्या अवयवांचे गूढ उकलले आहे. दिल्लीतील पांडव नगरमध्ये राहणाऱ्या तरुणाचा मृतदेह घरात कापून फ्रीझमध्ये ठेवण्यात आल्याचे सांगण्यात येत आहे. त्यानंतर मारेकरी दररोज पांडव नगर आणि पूर्व दिल्लीच्या वेगवेगळ्या भागात मृतदेहाचे तुकडे फेकायचे. ही सर्व घटना CCTV मध्ये कैद झाली आहे.

मिळालेल्या माहितीनुसार, आई आणि मुलाने मिळून ही हत्या केल्याचा धक्कादायक प्रकार समोर आला आहे. त्यांनी मृतदेहाचे तुकडे करून ते घरातील फ्रीजमध्ये लपवून ठेवले आणि नंतर पांडवनगर परिसरात फेकून दिले. पोलिसांनी दोन्ही आरोपींना अटक केली आहे. अमर उजाला या हिंदी वृत्तसंस्थेने दिलेल्या माहितीनुसार, या हत्येचे आरोपी आई पूनम आणि मुलगा दीपक असून ज्याची हत्या करण्यात आली तो महिलेचा नवरा होता. अंजन दास यांची हत्या अवैध संबंधातून झाल्याचं सांगण्यात येत आहे.