नवी दिल्ली : काँग्रेसच्या संसदीय दलाच्या नेतेपदी सोनिया गांधी यांची आज एकमताने निवड करण्यात आली. या निवडीनंतर संसदीय दलाच्या बैठकीत बोलताना त्यांनी विरोधकांवर जोरदार हल्ला केला. काँग्रेस पक्ष अनेक अडथळे आणि संकटे पार करून या निवडणुकीतून बाहेर पडलेला आहे. अनेकांनी आमचे मृत्युलेख लिहिले होते, असा शब्दांत त्यांनी विरोधकांना फटकारले.

लोकसभेतील नवनिर्वाचित खासदार व राज्यसभेतील काँग्रेसचे खासदारांच्या संसदीय दलाची आज बैठक झाली. लोकसभा निवडणुकीत काँग्रेसचे ९९ खासदार निवडून आले आहेत. संसदीय दलाच्या नेतेपदी सोनिया गांधी यांच्या निवडीला सर्व सदस्यांनी एकमताने मंजुरी दिली. या वेळी त्या म्हणाल्या, ‘‘काँग्रेस पुन्हा पुनर्जीवित होत असल्याचे संकेत या निकालाने दिले. हे यश शक्तिशाली यंत्रणेच्या विरोधातील आहे.

जी शक्ती आम्हाला संपविण्यासाठी दबा धरून बसली होती, या शक्तीने काँग्रेस पक्षाची आर्थिक व्यवस्था नेस्तनाबूत करण्याचा प्रयत्न केला. खोटा दुष्प्रचार करून आमच्या नेत्यांच्या विरोधात एक मोहीम चालविली होती. अनेकांनी आमच्यावर मृत्युलेख लिहून आम्ही संपलो असल्याचा दावा केला होता.’’ यावेळी त्यांनी ‘भारत जोडो यात्रा’ व ‘भारत जोडो न्याय यात्रे’चाही उल्लेख केला.

राहुल यांच्यावर व्यक्तिगत हल्ले झाले तरी ते डगमगले नाहीत. यासाठी त्यांचे विशेष कौतुक केले पाहिजे. या निवडणुकीत त्याने प्रचाराचे मुद्दे निश्चित केले. आता लोकसभेत विरोधकांची संख्या वाढल्याने सरकारला कारभार आपल्या मर्जीने कारभार करता येणार नाही, असा इशाराही त्यांनी दिला.

मल्लिकार्जुन खर्गे यांच्या निश्चयी व ठाम नेतृत्वामुळे या संकटातून बाहेर पडलो. ते आमच्यासाठी एक प्रेरणास्रोत आहेत. त्यांची पक्षाप्रती असलेली निष्ठा वादातीत आहे. त्यांच्यापासून आम्हाला खूप काही शिकता येईल.

- सोनिया गांधी, काँग्रेस नेत्या