नवी दिल्लीः दिल्लीचे मुख्यमंत्री अरविंद केजरीवाल यांच्या अंतरिम जामिनाला ७ दिवसांची मुदतवाढ देण्याची मागणी करणारी याचिका सुप्रीम कोर्टाने फेटाळली आहे. केजरीवाल यांना आता 2 जून रोजी आत्मसमर्पण करावे लागणार आहे.

मुख्यमंत्र्यांना नियमित जामीनासाठी ट्रायल कोर्टात जाण्याचे स्वातंत्र्य दिलेले असल्याने ही याचिका सुप्रीम कोर्टात राखता येणार नाही ,अस सांगत सुप्रीम कोर्टाच्या रजिस्ट्रीने अर्ज स्वीकारण्यास नकार दिला आहे.

दिल्ली मद्य घोटाळ्याप्रकरणी अरविंद केजरीवाल हे तुरुंगात होते. त्यांना कोर्टाने जामीन दिला. १ जूनला त्यांच्या जामिनाची मुदत संपणार आहे. त्यामुळे अरविंद केजरीवाल यांनी प्रकृतीच्या कारणास्तव सात दिवसांची अधिकची वेळ सुप्रीम कोर्टाकडे मागितली होती. पण, सुप्रीम कोर्टाने याप्रकरणी तात्काळ सुनावणी घेण्यास नकार दिला आहे. त्यामुळे ते १ जूननंतर पुन्हा तुरुंगात जाण्याची शक्यता निर्माण झाली आहे.

केजरीवाल यांनी आपल्या विनंती याचिकेत म्हटलं होतं की, 'माझ्या वजनामध्ये मोठी घट झाली असून माझे आरोग्य ठीक नाही. त्यामुळे मला आणखी सात दिवसांची सुट देण्यात यावी. जेणेकरुन मला आवश्यक उपचार घेता येतील.' मंगळवारी कोर्टाने अरविंद केजरीवाल यांच्या जामिनाच्या याचिकेवर तात्काळ सुनावणी घेण्यास नकार दिला होता. जामिनाचा चेंडू सरन्यायाधीश चंद्रचूड यांच्या कोर्टात गेला होता.

कोर्टाने १० मे रोजी अरविंद केजरीवाल यांना जामीन दिला होता. लोकसभा निवडणुकीचा प्रचार करता यावा यासाठी अपवाद म्हणून सरन्यायाधीशांनी हा निर्णय घेतला होता. तसेच १ तारखेला निवडणुकीच्या शेवटच्या टप्प्यातील मतदान पार पडल्यानंतर आत्मसमर्पन करण्यास सांगितले होते. केजरीवाल यांना सक्तवसुली संचालनालयाने मद्य घोटाळ्याप्रकरणात २१ मार्च रोजी अटक केली होती.