तामिळनाडू विधानसभेचं आज अर्थसंकल्पीय अधिवेशन सुरु झालं आहे. राज्याचे अर्थमंत्री पीटीआर पलानीवेल त्यागराजन यांनी राज्याचा अर्थसंकल्प सादर केला. हे तामिळनाडूचं पहिलं ई-बजट होतं. कोरोना संकटामुळे तामिळनाडू सरकारने ई-बजट राबवलं होतं. या बजेटमध्ये तामिळनाडूनं पेट्रोलवरील टॅक्स तीन रुपयांनी कमी केला आहे. त्यामुळे राज्यात आता पेट्रोल तीन रुपये स्वस्त मिळणार आहे. या निर्णयामुळे तामिळनाडू सरकारला प्रत्येक वर्षाला 1160 कोटी रुपयांचं नुकसान होणार आहे.

सरकारी महिला कर्मचाऱ्यांनाही तामिळनाडू सरकारने खूशखबर दिली आहे. सरकारी महिला कर्मचाऱ्यांच्या मॅटरनिटी लिव्ह वाढवण्यात आली आहे. पूर्वी 9 महिने मॅटरनिटी लिव्ह मिळत होती. मात्र, आता वर्षभर सरकारी महिलांना मॅटरनिटी लिव्ह मिळणार आहे.

500 कोटी रुपयांची गुंतवणूक करुन सेंटर फॉर क्लाइमेट चेंज याची स्थापना करण्यात येणार आहे. राज्यातील सर्व बचतगटासाठी 20 हजार कोटी रुपये दिले जाणार आहेत. राज्यातील सर्व लहान-मोठ्या 79 हजार 795 गावातील प्रत्येक व्यक्तील स्वच्छ पाणी देण्याचा प्लॅन आखण्यात आला आहे. तसेच एक लाखांपेक्षा जास्त लोकसंख्या असणाऱ्या 27 शहरांसाठीही भूमिगत गटारी योजना आखण्यात आली आहे. याशिवाय शेती आणि इतर उद्योग व्यावसायासाठी योजना लागू करण्यात आल्या आहेत.