Powerful Organization Help BJP in Gujarat elections 2022

नवी दिल्लीः भाजपची निवडणूक यंत्रणा अत्यंत बळकट असल्याचं सांगितलं जातं. पक्षाचे सर्व्हे अत्यंत गोपनीय रितीने पार पडतात. मात्र या संदर्भात एक टीएमएसएस नावाच्या संस्थेचं नाव पुढे येतंय. ही बलाढ्य संस्था भाजपसाठी मागील सात वर्षांपासून काम करत आहे.

गुजरातमध्ये सध्या निवडणुकीची रणधुमाळी सुरु आहे. काल पहिल्या टप्प्यातील ८९ मतदारसंघांसाठी मतदान प्रक्रिया पार पडली. १९ जिल्ह्यामध्ये हे मतदान संपन्न झाले. येत्या ५ डिसेंबरला पुढच्या टप्प्यातील मतदान संपन्न होईल.

असे काही मतदारसंघ असतात जे भाजपला कायम जड जातात. तिथं विजय मिळवणं जवळपास शक्य नसतं. अशा अवघड ठिकाणी काम करण्यासाठी भाजपकडे एक ४० हजार लोकांची संस्था असल्याची माहिती आहे. २०१५मध्ये उत्तर प्रदेशात या संघटनेचं काम सुरु झालं. भाजपला विजय मिळवून देणं, हाच त्यांचा उद्देश आहे.

हेही वाचाः आरामात फेडू शकाल अशीच घ्या कर्जे....

यासंदर्भात न्यूज १८ ने वृत्त दिले आहे. गुजरातमध्ये खेडबृह्मा नावाचा एक मतदारसंघ आहे. १९९५पासून येथील मतदारांनी भाजपला डावलेलं आहे. यावेळी तिथे भाजपने जोर लावलाय. या टीएमएसएस (TMSS) संघटनेचे सरचिटणीस अतुल मकाडिया यांनी सांगितलं की, खेडबृह्मा मतदारसंघ हा काँग्रेसचा बालेकिल्ला आहे. त्यामुळे आम्ही या विभागात आदिवासी समाजाकडे अध्यक्षपद दिलं. आदिवासी समाजात काम करणं सुरु केलं. त्यामुळे आमच्याकडे १०० असे कार्यकर्ते तयार झाले जे आदिवासींसाठी काम करत आहेत.

नेमकं काय आहे टीएमएसएस?

या संघटनेचं काम मतदारांवर प्रभाव टाकण्याचं आहे. जे मतदार भाजपपासून दूर आहेत आणि इतर पक्षांना मतदान करतात त्यांची मनं वळविण्याचं काम टीएमएसएस संघटना करते. संस्थेचे उपाध्यक्ष हिरेन मेहता यांनी सांगितलं की, आमच्यासोबत ४० हजार सदस्य आहेत. प्रत्येक जिल्हा तालुका आणि विधानसभा मतदारसंघात पदाधिकारी आहेत. भाजपप्रमाणे आमच्याकडे मोर्चा, विभाग आहेत. गुजरातमध्ये आम्ही ७८ जागांवर सक्रीय आहोत. प्रत्येत मतदारसंघात ५ ते १० हजार मतदारांना आम्ही प्रभावित करु शकतो.

'जिथं स्थानिक उमेदवार नसतो तिथं संस्था काम करते'

टीएमएसएस संस्थेचे गुजरात अध्यक्ष प्रवीण नाखुम यांनी सांगितलं की, जेव्हा भाजप स्थानिक उमेदवाराला तिकीट देत नाही तेव्हा तेथील लोक उमेदवारावर नाराज असतात. तेव्हा आम्ही जातो आणि त्यांना समजावतो. उमेदवारापेक्षा पक्षाकडे आणि विचारधारेकडे बघा... असं सांगून त्यांचा रोष शांत करण्यासाठी आमच्या नेटवर्कचा वापर करतो.

भाजपने या बलाढ्य यंत्रणेद्वारे गुजरातवर लक्ष्य केंद्रीत केलं आहे. गुजरात हे राज्य भाजपसाठी अत्यंत महत्त्वाचं आहे. त्यामुळे येनकेन प्रकारे इथं सत्ता स्थापन करणं भाजपला गरजेचं आहे.