जम्मू-काश्मीरच्या राजौरी सेक्टरमधील थानामंडी भागात गुरुवारी दहशतवाद्यांनी लष्करी वाहनावर केलेल्या हल्ल्यात तीन जवान शहीद झाले आहेत. तर इतर तीन जवान गंभीररित्या जखमी झाले आहेत. दरम्यान, दहशतवाद्यांनी केलेल्या गोळीबाराला आपल्या जवानांनी सडेतोड प्रत्युत्तर दिलं. काल संध्याकाळपासून या ठिकाणी लष्कराकडून सर्च ऑपरेशन राबवलं जात आहे. (Three Army personnel lost their lives while three others were injured in a terrorist attack in Rajouri sector)

लष्कराच्या दोन वाहनांवर हल्ला

एएनआयच्या वृत्तानुसार, राजौरी सेक्टरमधील थानामंडी भागात दहशतवाद्यांनी लष्कराच्या दोन वाहनांवर हल्ला केला. यावेळी आपल्या जवानांकडून त्यांना जोरदार प्रत्युत्तर देण्यात आलं. काल संध्याकाळपासून या भागात सुरू असलेल्या दहशतवाद्यांविरोधात सैन्याच्या संयुक्त मोहिमेला बळ देण्यासाठी अतिरिक्त कुमक मागवली होती. 48 राष्ट्रीय रायफल्सकडून या परिसरात सध्या शोधमोहिम सुरू आहे. (Marathi Tajya Batmya)

दोन वर्षात ३५ जवान शहीद झालेत

दरम्यान, गेल्या महिन्यात राजौरीतील कालाकोट इथं लष्कर आणि विशेष सुरक्षा दलांनी दहशतवादविरोधी कारवाई सुरू केल्यानंतर दोन कॅप्टनसह सैनिक शहीद झाले होते. गेल्या दोन वर्षांत या प्रदेशात दहशतवादविरोधी कारवायांमध्ये 35 हून अधिक जवान शहीद झाले आहेत.