नवी दिल्ली : तमिळनाडूतील सत्ताधारी ‘द्रमुक’चे नेते उदयनिधी स्टॅलिन यांनी सनातन धर्माबाबत केलेल्या वक्तव्याची गंभीर दखल घेताना देशभरातील आघाडीच्या २६० लोकांनी सरन्यायाधीश धनंजय चंद्रचूड यांना पत्र लिहिले असून त्यात त्यांनी उदयनिधी यांच्या भाषणाची न्यायालयाने दखल घ्यावी, अशी विनंती केली आहे.
उदयनिधी यांचे वक्तव्य द्वेषमूलक असल्याचे त्यांचे म्हणणे आहे. सरन्यायाधीशांना उद्देशून लिहिलेल्या या पत्रावर दिल्लीचे माजी न्यायाधीश एस.एन.धिंग्रा यांचीही स्वाक्षरी समावेश आहे. उदयनिधी हे केवळ द्वेषमूलक भाषण करून थांबले नाही तर त्यांनी माफी मागायला देखील नकार दिला असल्याचे त्यांचे म्हणणे आहे.
या पत्रावर एकूण २६० लोकांच्या स्वाक्षऱ्या असून त्यामध्ये १४ निवृत्त न्यायाधीश, १३० माजी नोकरशहा आणि ११८ माजी लष्करी अधिकाऱ्यांचा समावेश आहे. ‘उदयनिधी यांच्या वक्तव्याची आम्हाला चिंता वाटते, त्यांचे विधान हे देशातील बहुसंख्य लोकांविरोधात निर्विवादपणे द्वेषमूलक स्वरूपाचे आहे.
राज्यघटनेने जे धर्मनिरपेक्षतेचे मूल्य घालून दिले आहे, तिच्या मुळावरच हा घाला घालण्याचा प्रकार आहे,’ असा दावाही या पत्रात करण्यात आला आहे. देशाच्या धर्मनिरपेक्ष चारित्र्याचे संरक्षण करायचे असेल तर उदयनिधी यांच्यावर तातडीने कारवाई करणे गरजेचे आहे, अशी मागणी देखील या पत्रातून करण्यात आली आहे. प्रशासकीय पातळीवरून याबाबतच्या कारवाईला विलंब होत असेल तर तो न्यायालयाचाच अवमान ठरेल, असे या पत्रामध्ये नमूद करण्यात आले आहे.
हिटलरशी तुलना
भाजपने देखील याच मुद्यावरून आक्रमक भूमिका घेतली आहे. ‘उदयनिधी यांचे वक्तव्य हे द्वेषमूलक स्वरूपाचे असून सनातन धर्माचे पालन करणाऱ्या ८० टक्के लोकांचा वंशच्छेद करण्याचे आवाहन त्यांनी केले आहे. काँग्रेस आणि विरोधकांची ‘इंडिया’ आघाडी स्टॅलिन यांच्या वक्तव्याचे समर्थन करते का?’ हे त्यांनी स्पष्ट करावे, असे आव्हान भाजपने दिले आहे. भाजपने उदयनिधी यांची हिटलरशी तुलना केली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.