उत्तर प्रदेश (UP Election 2021) विधानसभा निवडणुकीसाठी भाजपने (BJP) त्यांच्या उमेदवारांची आणखी एक यादी जाहीर केली आहे. यात ४५ नावे असून अमेठीतून राजा डॉक्टर संजय सिंह (Raja Dr Sanjay Singh) यांना उमेदवारी दिली गेली. तर दुसरीकडे योगींच्या मंत्रिमंडळातील मंत्री स्वाती सिंह (Swati Singh) यांना तिकिट नाकारलं मात्र, त्यांचे पती दयाशंकर सिंह (Daya Shankar Singh) यांना बलिया नगरमधून तिकिट दिलं आहे. याशिवाय भाजपने बलियातील बैरियात आमदार सुरेंद्र सिंह यांना डावलून आनंद स्वरुप शुक्ला यांना उमेदवारी दिली आहे.

दयाशंकर हे स्वत: आणि त्यांच्या पत्नी स्वाती सिंह दोघेही लखनऊत सरोजनी नगरमध्ये निवडणूक लढवण्यासाठी इच्छूक होते. मात्र, पक्षाने दोघांच्या भांडणात तिसऱ्या व्यक्तीला म्हणजेच राजराजेश्वर सिंह यांना इथून उमेदवारी जाहीर केली. याआधीच्या यादीमध्ये त्यांचे नाव जाहीर केले गेले. त्यानंतर दयाशंकर यांनी तेव्हा पत्नीला तिकिट नाकारल्यानंतरही आनंद व्यक्त केला होता. तसंच राजराजेश्वर सिंह यांना पूर्ण पाठिंबा देऊ असंही म्हटलं होतं.

दयाशंकर सिंह यांनी तेव्हा प्रतिक्रिया देताना म्हटलं होतं की, आता राजराजेश्वर सिंह यांना निवडून आणण्यासाठी सर्व शक्ती पणाला लावेन. दोघेही बलिया गावचे असून दोघांचे कौटुंबिक संबंध आहेत. तसंच तिकिट देणं न देणं हा पक्षाचा निर्णय आहे. पक्षाने आमच्यासाठीसुद्धा काहीतर चांगलं ठरवलं असेल असंही ते म्हणाले होते. आता पक्षाने त्यांना बलिया नगरमधून उमेदवारी दिली आहे.

बलिया नगरमध्ये याआधी आमदार आनंद स्वरुप शुक्ला हे निवडून आले होते. त्यांचा पत्ता कट करून उत्तर प्रदेश भाजपचे दयाशंकर सिंह यांची वर्णी लागली आहे. दया शंकर सिंह हे मूळचे बक्सर बिहारचे आहेत. हा जिल्हा बलियाला लागून आहे. त्यांचे शिक्षण आणि राजकारणाची सुरुवातसुद्धा बलियातून झाली आहे. त्यामुळेच त्यांना बलियामधून तिकिट दिलं गेल्याचं म्हटलं जात आहे.