उत्तर प्रदेश : उत्तर प्रदेशच्या राजकीय वर्तुळातून एक मोठी बातमी समोर येत आहे. राजकीय वैर विसरून समाजवादी पक्षाचे (Samajwadi Party) अध्यक्ष अखिलेश यादव (Akhilesh Yadav) यांनी आगामी विधानसभा निवडणुकीत (Uttar Pradesh Assembly Election) आपल्या काकांच्या प्रगतीशील समाजवादी पक्षासोबत युती करण्याचा निर्णय घेतलाय. तशी त्यांनी एकत्र निवडणूक लढवणार असल्याची घोषणाही केलीय. काका शिवपाल यादव (Shivpal Yadav) यांच्यासाठी ही दिवाळीची मोठी भेट मानली जात आहे.

कारण, शिवपाल सिंह सपासोबत युती करण्यात बराच काळ गुंतले होते आणि सतत वक्तव्येही करत होते. पण, आज अखिलेश यादव यांनी त्यावर शिक्कामोर्तब केलंय. अखिलेश म्हणाले, आगामी विधानसभा निवडणुकीत सपा काकांच्या प्रगतीशील समाज पक्षासह प्रादेशिक पक्षांसोबत युती करणार आहे. 22 नोव्हेंबरला मुलायम सिंह यांच्या वाढदिवसापूर्वी अखिलेश यादव काकांसोबत युती करण्याची घोषणा करू शकतात, असं मानलं जात होतं. पण, त्यापूर्वीच घोषणा करून अखिलेश यांनी काकांना दिवाळीची भेट दिलीय.

काकांना पूर्ण सन्मान देणार असल्याचंही त्यांनी सांगितलंय. सध्या शिवपाल सिंह यांच्यासाठी ही दिलासादायक बातमी मानली जात आहे. कारण, ते आपल्या राजकीय अस्तित्वासाठी लढत होते. राज्यात पीएसपीचे विलीनीकरण व्हावं, यासाठी सपा त्यांच्यावर दबाव आणत होती. गेल्या विधानसभा निवडणुकीपासून काका-पुतण्यांमध्ये राजकीय वैर आहे. मुलायमसिंह यादव यांच्या वाढदिवसाच्या दिवशी हे युद्ध संपुष्टात येऊ शकतं, असं मानलं जात होतं. मात्र, अखिलेश यादव यांनी दिवाळीपूर्वीच युतीची घोषणा करुन यावर शिक्कामोर्तब केलं.