भोपाळ : मध्य प्रदेश येथील कुरवई केथोरा रेल्वे स्थानकावर वंदे भारत एक्स्प्रेसमधील एका डब्याच्या बॅटरी बॉक्समध्ये आग लागल्याची माहिती समोर आली आहे. या घटनेनंतर अग्निशमन दलाने घटनास्थळी पोहोचून तत्परतेने आग विझवली आहे अशी माहिती भारतीय रेल्वेच्या अधिकाऱ्यांनी दिली असून या घटनेचा व्हिडिओ समोर आला आहे.

अधिक माहितीनुसार, कुरवई केथोरा स्थानकावर वंदे भारत एक्स्प्रेसमधील एका डब्याच्या बॅटरी बॉक्समध्ये आग लागली होती. या दुर्घटनेमध्ये कोणत्याही प्रवाशाला दुखापत झाली नसून ही आग फक्त बॅटरी बॉक्सपुरतीच मर्यादित होती. चाचणीनंतर ट्रेन पुन्हा रवाना केली जाणार असल्याची माहिती रेल्वेने दिली आहे.

दरम्यान, वंदे भारत ट्रेन ही सुपरफास्ट ट्रेन म्हणून पंतप्रधान मोदी यांच्या हस्ते लोकार्पित करण्यात आली होती. त्यानंतर तिचे अनेक ठिकाणी किरकोळ अपघात झाले होते. यामध्ये जनावरे जखमी झाल्याची माहिती समोर आली होती. तर वंदे भारत ट्रेनच्या एका डब्यात पावसाचे पाणी गळत असल्याचा व्हिडिओ समोर आला होता. त्यानंतर मध्यप्रदेशमध्ये या ट्रेनच्या बॅटरी बॉक्सला आग लागल्याची घटना घडली आहे.