दिल्ली: राजधानी दिल्लीतून एक धक्कादायक प्रकार समोर आला आहे. दिल्लीच्या पश्चिम विहारमध्ये एका व्यक्तीने आपल्या शेजाऱ्याच्या पाळीव कुत्र्याने भुंकल्याने त्याच्यावर लोखंडी रॉडने हल्ला केला. कुत्र्याच्या मालकाला रॉडने मारून बेशुद्ध केले. यावेळी कुटुंबातील इतर सदस्यांनाही त्या व्यक्तीने बेदम मारहाण केली. पीडित कुटुंबातील या हल्ल्यात तीन जण जखमी झाले आहेत. ही संपूर्ण घटना सीसीटीव्ही कॅमेऱ्यात कैद झाली आहे. जखमींना शेजारच्या रुग्णालयात दाखल केले आहे.

एएनआय या वृत्तसंस्थेनुसार, कुत्र्याच्या मालकाचे म्हणणे आहे की, आम्ही तक्रार दाखल केली आहे. तरीही अद्याप एफआयआर दाखल करून घेतले नाही. जखमींवर रुग्णालयात उपचार सुरू आहेत. या घटनेचा व्हिडिओ सोशल मीडियावर व्हायरल होत आहे. व्हिडिओमध्ये पाहू शकता की, लाल शर्ट घातलेला माणूस एका कुत्र्याच्या मागे लोखंडी रॉड घेऊन धावत आहे. एक महिला आणि तिचा पती त्या तरुणाला हल्ला करण्यापासून रोखण्याचा प्रयत्न केला. हल्लेखोराने त्यांच्यावरही लोखंडी रॉड मारले. त्यानंतर त्यांच्या मुलाने हल्लेखोराला रोखण्याचा प्रयत्न केला असता हल्लेखोराने त्यांच्या डोक्यात रॉडने वार केले. त्यामुळे त्यांच्या कपाळातून रक्त वाहू लागले.