कोलकाता : पश्चिम बंगालमधील भवानीपूर पोटनिवडणूक पुढे ढकलण्याची मागणी करणारी याचिका कोलकाता हायकोर्टानं फेटाळून लावली आहे. त्यामुळे ही निवडणूक आता ठरलेल्या वेळापत्रकानुसारच ३० सप्टेंबर रोजीच होणार आहे. प्रचारादरम्यान निर्माण झालेल्या हिंसक गोंधळानंतर भाजपकडून ही निवडणूक पुढे ढकलण्याची मागणी याचिकेद्वारे करण्यात आली होती.

सोमवारी प्रचारादरम्यान भाजपचे नेते दिलीप घोष यांच्यावर तृणमूलच्या कार्यकर्त्यांनी हल्ला केल्याचा भाजपनं आरोप केला होता. यामुळे भाजपच्या अनेक नेत्यांनी ही पोटनिवडणूक पुढे ढकलण्याची मागणी करत होते. तर दुसरीकडे स्वप्नदास गुप्ताने निवडणूक आयोगाकडे मतदान केंद्राच्या परिसरात कलम १४४ लागू करण्याची मागणी केली होती. तसेच सीआरपीएफच्या उपस्थितीत निवडणूक घेण्याची मागणी केली होती.

भवानीपूरमधून ममता बॅनर्जी लढवणार निवडणूक

भवनीपूर या जागेवरुन तृणमूल काँग्रेसकडून मुख्यमंत्री ममता बॅनर्जी या निवडणूक लढवणार आहेत. तर भाजपकडून प्रियंका टिबरेवाल यांना मैदानात उतरवलं आहे. या निवडणुकीत सत्ताधारी पक्ष तृणमुल काँग्रेस आणि भाजप एकमेकांविरोधात उभे ठाकले आहेत. पश्चिम बंगालमध्ये मे महिन्यात पार पडलेल्या विधानसभा निवडणुकीत ममता बॅनर्जी यांचा नंदीग्राम मतदारसंघातून पराभव झाला होता. तरीही त्यांची मुख्यमंत्रीपदी नियुक्ती झाली. त्यामुळे त्यांना विधानसभा सदस्यत्व मिळवण्यासाठी एखाद्या जागेहून निवडणूक येणं गरजेचं होतं. त्यामुळे ममतांसाठी तृणमूलचे आमदार शोभन देव चटोपाध्याय यांनी राजीनामा दिला होता. म्हणून आता इथे पोटनिवडणूक जाहीर झाली आहे.