देशात आज मतदान पार पडलं तर कोणाचं सरकार (Central Government) स्थापन होऊ शकतं... कोणाला किती मतं मिळू शकतात? या प्रश्नांची उत्तर जाणून घेण्यासाठी आणि देशाचा मूड जाणून घेण्यासाठी इंडिया टुडे-सी व्होटरने प्रयत्न केला आहे. यामध्ये जनतेची मनस्थिती जाणून घेण्याचा प्रयत्न करण्यात आला, तर इतर अनेक प्रश्नांची उत्तरं देखीलं मतदारांकडून मिळाली आहेत. गेल्या काही दिवसांपासून देशात एक प्रश्न कायम विचारला जातो, तो म्हणजे पंतप्रधान नरेंद्र मोदींना (PM NarendraModi) पर्याय कोण? जनतेच्या मते सध्या विरोधकांमध्ये सर्वात मोठा चेहरा कोण आहे? या प्रश्नाची उत्तरं देखील यामधून समोर आली आहेत.

केंद्रातील मोदी सरकारच्या विरोधात कोण चांगली लढच देतंय? या प्रश्नाचं उत्तर देताना अनेकांनी पश्चिम बंगालच्या मुख्यमंत्री यांचं नाव घेतलं आहे. ममता बॅनर्जी यांनी 17 टक्के लोकांनी पसंती दिली असून, त्यांच्या नंतर दुसऱ्या स्थानावर अरविंद केजरीवाल यांच्या नावाला १६ टक्के लोकांनी पसंती दिली आहे. तर राहुल गांधींना केवळ ११ टक्के मतं मिळाली असून, ते या यादीत तिसऱ्या क्रमांकावर आहेत.

देशात पंतप्रधान नरेंद्र मोदी यांच्यानंतर भाजपमध्ये त्यांचा उत्तराधिकारी कोण असू शकतो, असा प्रश्न देखील या सर्व्हेमध्ये विचारण्यात आला. यावर जी उत्तरं आली ती खूपच रंजक आहेत. या मुद्यावर देशाचा मूड जाणून घेण्याचा प्रयत्न केला असता, अनेकांनी पंतप्रधानपदासाठी मोदींनंतर देशाचे विद्यमान गृहमंत्री अमित शहा यांना दिली आहे. अमित शहा यांना 24 टक्के लोकांनी पसंती दिली, तर यूपीचे मुख्यमंत्री योगी आदित्यनाथ यांना 23 टक्के लोकांनी पसंती दिल्याने ते दुसऱ्या स्थानावर आहेत. या यादीत केंद्रीय मंत्री आणि भाजपचे नेते नितीन गडकरी यांच्या नावाचा देखील समावेश आहे. गडकरींना 11 टक्के लोकांनी पसंती दिली आहे.