भोपाळ: महिलांवर होणारे अत्याचार (crime against women) रोखण्यासाठी कठोर कायदे करुनही महिलांवरील अत्याचार कमी झालेले नाहीत. एका महिला कॉन्स्टेबलने, तीन जणांनी मिळून तिच्यावर सामूहिक बलात्कार (rape) केल्याचा आरोप केला आहे. आरोपींनी बलात्काराच्या कृत्याचे व्हिडीओ चित्रीकरण (video shoot) करुन जीवे ठार मारण्याची धमकी दिली, असे पीडीत महिलेने म्हटले आहे. मध्य प्रदेशातील (Madhya pradesh) नीमच जिल्ह्यात ही धक्कादायक घटना घडली. पीटीआयने हे वृत्त दिले आहे.

या महिन्याच्या सुरुवातीला ही घटना घडली पण पीडीत महिलेने १३ सप्टेंबरला तक्रार नोंदवली. त्यानंतर चौकशी करुन पाच जणांविरोधात गुन्हा नोंदवण्यात आला आहे. या गुन्ह्यामध्ये मुख्य आरोपीची आई सहभागी असल्याचं समोर आलं आहे.

बर्थ डे पार्टीमध्ये मुख्य आरोपी, त्याचा भाऊ आणि अन्य एका व्यक्तीने माझ्यावर बलात्कार केला, असा आरोप महिलेने केला आहे. मुख्य आरोपीने महिलेला ब्लॅकमेल केले व अन्य नातेवाईकांनी जीवे मारण्याची धमकी देऊन पैसे उकळण्याचा प्रयत्न केला असे महिलेने तिच्या तक्रारीत म्हटले आहे.

"आरोपीने फेसबुकवरुन पीडित महिलेबरोबर मैत्री केली. त्यानंतर एप्रिल महिन्यापासून व्हॉट्स अॅपवरुन त्यांच्यात चॅटिंग सुरु होते. आरोपीने पीडीत महिलेला लहान भावाच्या बर्थ डे पार्टीच्या निमित्ताने बोलावले, तिथे तिच्यावर बलात्कार करण्यात आला" अशी माहिती महिला पोलीस ठाण्याच्या प्रमुख अनुराधा गिरवळ यांनी दिली. मुख्य आरोपी आणि त्याच्या आईला अटक करण्यात आली आहे, अशी माहिती गिरवळ यांनी दिली.