नवी दिल्ली : एका ३६ वर्षीय महिलेची त्यांच्याच वाहन चालकाने गळा दाबून हत्या केल्याची घटना समोर आली आहे. ६ वर्षीय चिमुकलीमुळे घटना उघडकीस आली असून आरोपीला अटक करण्यात आली आहे. दिल्लीतील सीआर पार्कमध्ये (Delhi Crime) ही घटना घडली.

पोलिसांनी दिलेल्या माहितीनुसार, किम्मी बस्सी असे मृत महिलेचे नाव आहे. ती सीआर पार्क परिसरात दोन मुले आणि पतीसोबत राहत होती. तिच्या पतीचे पहाडगंजमध्ये भोजनालय आहे. २ नोव्हेंबरला महिला तिच्या घरात पडली असल्याची माहिती पोलिसांना मिळाली. त्यानंतर पोलिसांनी तत्काळ घटनास्थळी दाखल होत तिला एम्स रुग्णालयात नेले. मात्र, त्याठिकाणी तिला मृत घोषित करण्यात आले. तसेच तिच्या मानेवार काही जखमा आढळून आल्याची माहिती डॉक्टरांनी दिली. त्यानंतर तिची हत्या झाली असावी असा संशय पोलिसांना आला. पोलिसांनी खुनाचा गुन्हा दाखल केला. तपासादरम्यान, तपास पथकाने मृताच्या कुटुंबियांची भेट घेतली. यावेळी सहा वर्षांच्या चिमुकलीमुळे आरोपीची ओळख पटली. आईचा खुन झाला त्यावेळी चालक सचिन त्याठिकाणी उपस्थिती असल्याचे तिने पोलिसांना सांगितले. सचिनच्या शोधासाठी पथके तयार करण्यात आला. मात्र, त्याचा फोन बंद होता. पोलिसांनी अनेक ठिकाणी छापे टाकून सचिनला अटक केली. पोलिस शवविच्छेदन अहवालाची वाट पाहत आहेत. मात्र, प्राथमिक माहितीवरून गुन्हा नोंदविण्यात आला आहे.