लखनऊ : उत्तरप्रदेशमधील एका २३ वर्षीय युवकाने आपल्या राहत्या घरी फाशी घेत आत्महत्या केल्याची घटना घडली आहे. त्याने एका मुस्लीम मुलीशी तीन वर्षापूर्वी लग्न केले होते. त्यानंतर मुलीच्या नातेवाईकांकडून त्याला धर्मांतर करण्यासाठी दबाव आणला जात असल्याने त्याने आत्महत्या केली असल्याचा दावा त्याच्या नातेवाईकांनी केला आहे.

हेही वाचा - T+1 Settlement मुळे वाढेल शेअर बाजारातली उलाढाल

पोलिसांनी दिलेल्या माहितीनुसार, दुष्यंत चौधरी असं आत्महत्या केलेल्या तरूणांच नाव असून तो शनिवारी आपल्या खोलीत झोपला होता. सकाळी बराच वेळ तो खोलीच्या बाहेर न आल्यामुळे त्याची आई शिक्षादेवी यांनी खोलीत जाऊन बघितले तर दुष्यंतचा मृतदेह लटकत होता.

त्यानंतर मृतदेह खाली उतरवून शवविच्छेदनासाठी हॉस्पिटलमध्ये पाठवण्यात आला. शवविच्छेदनानंतर आत्महत्येचं मुख्य कारण समजेल असं सीओ अरविंद चौरसिया यांनी सांगितलं.

दरम्यान, मृत दुष्यंत याने तीन वर्षापूर्वी मेरठ येथील फरहा नावाच्या मुस्लीम मुलीशी नातेवाईकांच्या परवानगीशिवाय लग्न केलं होतं. त्यानंतर काही दिवस ते आपापल्या घरी राहिले. दुष्यंत आपल्या पत्नीला आपल्या घरी घेऊन येणार होता.

पण त्याच्या सासरच्या लोकांनी अगोदर धर्मपरिवर्तन करण्याची अट घातली. जर तू इस्लाम धर्म स्वीकारत धर्मपरिवर्तन केले तर मुलगी त्याच्याबरोबर पाठवू असं त्यांनी सांगितलं. त्यामुळे तो मागच्या काही दिवसांपासून तणावात होता अशी माहिती मृत दुष्यंत याचा चुलतभाऊ जॉनी चौधरी याने सांगितलं.

तर या प्रकरणी पोलिसांनी फरहासहित तिच्या कुटुंबातील चार लोकांवर गुन्हा दाखल केला आहे. त्यानुसार पोलीस अधिक तपास करत असल्याची माहिती आहे.