पुणे - भारतीय सैन्यदलात नोकरी करण्याची इच्छा बाळगणाऱ्या तरुण-तरुणींसाठी सैन्यदलातर्फे अग्नीवर योजने अंतर्गत भरती प्रक्रिया सुरू करण्यात आली आहे. ही भरती प्रक्रिया खडकी येथील बॉम्बे इंजिनिअरिंग ग्रुप (बीईजी) येथे होणार आहे. याबाबतची माहिती सैन्यदलातर्फे देण्यात आली आहे.

अग्नीवर योजने अंतर्गत होणारी ही भरती प्रक्रिया २० ते २४ नोव्हेंबर दरम्यान पुरुष उमेदवारांसाठी तर २५ ते २९ नोव्हेंबर या कालावधीत महिला उमेदवारांसाठी होणार आहे. हा भरती मेळावा महाराष्ट्र, गुजरात, गोवा राज्यांसह दमन आणि दीव तसेच दादरा आणि नगर हवेली या केंद्रशासित प्रदेशातील तरुणांसाठी असेल.

यामुळे तरुणांना सैन्यदलात भरती देशसेवा करण्याची संधी मिळेल. यामध्ये १० वी आणि ८ वी उत्तीर्ण झालेल्या उमेदवारांची अग्नीवर जनरल ड्यूटी, तांत्रिक, लिपिक अशा विविध विभागांसाठी ही भरती केली जाणार आहे. तसेच महिला उमेदवारांसाठी लष्करी पोलिस विभागात भरती प्रक्रिया राबवली जाईल.

दरम्यान बीईजी येथे आयोजित केलेला हा भरती मेळावा राज्यातील पुणे, नगर, बीड, लातूर, उस्मानाबाद आणि सोलापूर या सहा जिल्ह्यातील उमेदवारांसाठी असेल. तर ऑनलाइन सामाईक प्रवेश परीक्षा उत्तीर्ण झालेल्या उमेदवारांची प्रवेशपत्रे सैन्यदलाच्या वतीने त्यांच्या संबंधित ई-मेलवर पाठविण्यात आले आहे.

महत्त्वाचे म्हणजेच प्रवेशपत्र आणि भरतीसाठी आवश्‍यक ती कागदपत्रे असलेल्या उमेदवारांनाच या भरती मेळाव्यात सहभागी होता येणार असल्याचे आवाहन सैन्यदलातर्फे करण्यात आले आहे.