पुणे : केंद्रीय माध्यमिक शिक्षण मंडळाच्या (CBSE) परीक्षेच्या निकालात विद्यार्थ्यांना प्रात्यक्षिक आणि लेखी परीक्षेत मिळालेल्या गुणांच्या प्रमाणात बरीच तफावत असल्याचे निदर्शनास आले आहे. त्यामुळे शाळांनी त्यांच्या अंतर्गत मूल्यांकन प्रक्रियेची पुनर्तपासणी करावी, अशी सूचना सीबीएसईने दिली आहे.

सीबीएसईने दहावी-बारावीच्या परीक्षांमध्ये (10th-12th Exam) विद्यार्थ्यांना मिळालेल्या गुणांचे, निकालाच्या सांख्यिकी माहितीचे कृत्रिम बुद्धिमत्तेच्या साधनाचा वापर करून विश्लेषण केले. यात ही बाब निदर्शनास आली. गेल्या काही वर्षात दहावी आणि बारावीच्या परीक्षांमध्ये विद्यार्थ्यांचे गुण मोठ्या प्रमाणात वाढत आहेत. ९० टक्क्यांपेक्षा अधिक गुण मिळविणाऱ्या या विद्यार्थ्यांची संख्याही वाढत आहे.

त्या अनुषंगाने सीबीएसईने प्रगत कृत्रिम बुद्धीमत्ता साधनांद्वारे गेल्या वर्षीच्या निकालांच्या माहितीच्या आधारे केलेल्या विश्लेषणात सीबीएसईशी संलग्न पाचशे शाळांमध्ये ५० टक्के किंवा त्यापेक्षा अधिक विद्यार्थ्यांच्या काही विषयांच्या लेखी आणि प्रात्यक्षिक परीक्षेतील गुणांमध्ये फरक आढळला आहे, अशी माहिती  सीबीएसईने परिपत्रकाद्वारे दिली आहे.

विश्लेषणात आढळून आलेल्या तफावतीमुळे शाळांनी प्रात्यक्षिक परीक्षांचे मूल्यमापन अधिक बारकाईने करण्याची गरज सीबीएसईने अधोरेखित केली आहे. त्यासाठी शाळांनी अंतर्गत मूल्यांकन प्रक्रियेची पुनर्तपासणी करण्याची आवश्यकता आहे. अंतर्गत मूल्यमापन प्रक्रिया वास्तववादी आणि विश्वासार्ह असावी, विद्यार्थ्यांच्या शैक्षणिक कारकिर्दीमध्ये महत्त्वपूर्ण भर घालत असल्याची खात्री देणे, हा यामागील उद्देश आहे. प्रात्यक्षिक परीक्षांचे मूल्यमापन योग्य पद्धतीने आणि अचूक होण्यासाठी या सूचना उपयुक्त ठरतील, असे सीबीएसईने परिपत्रकात स्पष्ट केले आहे.