परभणी: आगामी विधानसभा निवडणुकीत परभणीची जागा महायुतीमधून भाजपच्या वाट्याला आल्याचा दावा भाजप नेत्यांनी केला आहे. पक्षश्रेष्ठींनी या निर्णयावर शिक्कामोर्तब केल्याची माहिती भाजप उद्योग आघाडीचे प्रदेशाध्यक्ष प्रमोद वाकोडकर यांनी दिली.

मात्र, उमेदवारी कुणाला द्यायची? याबाबत अद्याप कोणताही निर्णय झालेला नाही, असेही वाकोडकर यांनी सांगितले.

परभणी विधानसभा भाजपच्या ताब्यात आल्याने कार्यकर्ते आणि नेत्यांमध्ये उत्साहाचे वातावरण आहे. शुक्रवारी (ता. १३) शहरातील शिवाजी चौकात कार्यकर्त्यांनी घोषणाबाजी करत आनंदोत्सव साजरा केला. भाजपकडून परभणी विधानसभेसाठी इच्छुकांची संख्या मोठी आहे.

विधानसभा अध्यक्ष आनंद भरोसे, भाजपचे ज्येष्ठ नेते विजयराव वरपुडकर, प्रमोद वाकोडकर, शहर जिल्हाध्यक्ष राजेश देशमुख, सुरेश भुमरे, डॉ. केदार खटिंग यांची नावे चर्चेत आहेत. मात्र, अद्याप कोणाच्याही उमेदवारीवर पक्षाने निर्णय घेतलेला नाही. यापूर्वी झालेल्या लोकसभा निवडणुकीत भाजपचा मित्रपक्ष असलेल्या राष्ट्रीय समाज पक्षाला पराभवाचा सामना करावा लागला होता. तरीही चांगली मते मिळाल्यामुळे भाजपचा आत्मविश्वास वाढला आहे.

परभणीची जागा कमळवारच लढवणार..

परभणी विधानसभेची जागा महायुतीतून भाजपच्या वाट्याला आली आहे. आता ही जागा कमळ चिन्हावरच लढवली जावी, असा आमचा आग्रह आहे.

: प्रमोद वाकोडकर, प्रदेशाध्यक्ष, उद्योग आघाडी, भाजप.

#ElectionWithSakal