हदगाव : तालुक्यातील गोर्लेगाव येथील रहिवासी तथा नांदेड शहरातील नेत्रतज्ञ डॉ. रेखा चव्हाण यांनी विधानसभा लढविण्याची तयारी सुरू केली आहे. त्यामुळे चर्चेला उधाण आले आहे. हदगाव विधानसभा मतदारसंघात काँग्रेस पक्षाकडून निवडणूक लढविण्याकरिता इच्छुक असलेल्या डॉ. रेखा चव्हाण यांना नेमके ‘सिग्नल’ कुणाचे? याबाबत मतदारसंघात चर्चा आहे.

काँग्रेस पक्षाकडून सक्षम उमेदवार म्हणून आपल्याच नावाला पक्षश्रेष्ठी प्रथम पसंती देतील, अशी अपेक्षा रेखा चव्हाण यांना आहे. महिलांना ३३ टक्के आरक्षण या काँग्रेसच्या धोरणानुसार महिलांची मतदारसंघातील शक्ती पाहून उमेदवारी देणार असल्याचे चव्हाण यांचे हितचिंतक सांगतात. यानिमित्त डॉ. रेखा चव्हाण यांचे मतदारसंघात दौरे सुरु असून मतदारांशी संवाद साधत आहे. त्यांनी यापूर्वी जिजाऊ ब्रिगेडच्या विविध पदांवर काम केले आहे. तसेच काँग्रेस पक्षाच्या प्रदेश उपाध्यक्षा म्हणून संघटनांचे काम केले.

जवळगावकरांसमोर निभाव लागेल का ?

आमदार माधवराव जवळगावकर यांनी या मतदारसंघाचे दोनवेळा नेतृत्व केलेले आहे. २००४ पासून चारवेळा त्यांनी काँग्रेस पक्षाकडून निवडणूक लढवली. यामध्ये त्यांना दोनवेळा यश आले, तर दोनवेळा अपयश. तरीही पक्षाने त्यांना चारवेळा संधी दिली, हेही नाकारून चालणार नाही. जवळगावकरांना उमेदवारीबाबत ‘ग्रीन सिग्नल’ मिळत आले. यावेळी त्यांच्याच नावावर शिक्कामोर्तब होईल, असे समर्थक ठामपणे सांगतात. त्यामुळे जवळगावकर यांच्यासमोर डॉ. रेखा चव्हाण यांचा पक्षाकडून उमेदवारी मिळविण्यात निभाव लागणार का? असाही प्रश्न उपस्थित होतो.

मतदारसंघात जवळगावकरांची पकड मजबूत; जवळगावकरांचा पासपोर्ट

गेल्या तीस वर्षांपासून पक्षाशी एकनिष्ठ असलेले जवळगावकर घराणे सर्व दूरपरिचित आहेत. कै. निवृत्तीराव जवळगावकर, कै. पंजाबराव जवळगावकर काँग्रेस पक्षासोबत एकनिष्ठ राहिलेले घराणे म्हणून मराठवाड्यात ओळख आहे. तसेच काँग्रेस पक्षाशी एकनिष्ठ असलेले आमदार जवळगावकर यांना हदगाव मतदारसंघात मानणारा मोठा वर्ग आहे. मतदारसंघात त्यांची मोठी पकड आहे. पक्षश्रेष्ठी त्यांच्याच नावाला ग्रीन सिग्नल देतील, असे हितचिंतक सांगतात.

#ElectionWithSakal