मुंबई : यंदा विधानसभेसाठी राज्यात बरीच राजकीय उलथापालथ पाहायला मिळणार आहे. यातील सर्वात धक्कादायक बाब म्हणजे निलेश राणे यंदा विधानसभा निवडणूक लढवण्यासाठी इच्छूक असल्याचं कळतंय. पण त्यांना शिवसेनेच्या तिकीटावर निवडणूक लढवावी लागू शकते, अशी परिस्थिती निर्माण झाली आहे. यावर लवकरच शिक्कामोर्तब होण्याची शक्यता वर्तवली जात आहे.

राणे कुटुंबीय सध्या भाजपत आहेत. नारायण राणे हे भाजपचे माजी मंत्री अन् आता खासदार आहेत. तर राणेंचे कनिष्ठ पुत्र नितेश राणे हे भाजपचे आमदार आहेत. पण आता त्यांचे ज्येष्ठ पुत्र निलेश राणे हे निवडणुकीच्या रिंगणात उतरु इच्छित आहेत. पण निलेश राणे यांना शिवसेनेच्या तिकिटावर की भाजपच्या तिकीटावर लढवायचं याचा निर्णय लवकरच होणार आहे, अशी माहिती साम टीव्हीच्या सुत्रांनी दिली आहे. निलेश राणे कुडाळ-मालवण मतदारसंघातून विधानसभा लढवण्यास इच्छुक आहेत.

दरम्यान, भाजप नेते नारायण राणे यांनी काही वेळापूर्वी मुख्यमंत्री एकनाथ शिंदे यांची वर्षा निवासस्थानी जाऊन भेट घेतली. या भेटीनंतर मुख्यमंत्री एकनाथ शिंदे यांनी उद्योग मंत्री उदय सामंत यांना तातडीनं वर्षा निवासस्थानी भेटण्यासाठी बोलवले आहे. त्यामुळं निलेश राणेंसाठीच काही घडामोडी घडत असल्याची कुजबुजही राजकीय वर्तुळात सुरु झाली आहे.