उत्तरकाशी - उत्तराखंड विधानसभा निवडणुकीत (Uttarakhand Assembly Election) मोदी फॅक्टरकडून (Modi Factor) भाजपला (BJP) मोठ्या आशा आहेत. २०१७ च्या निवडणुकीत मोदी फॅक्टरने भाजपला यश मिळवून दिले होते. उत्तराखंडमध्ये थंडीने गेल्या २४ वर्षांचा विक्रम मोडला आहे. नैनितालच्या उंच भागात दीड फूट, तर मुक्तेश्वरमध्ये अडीच ते तीन फूट हिमवृष्टी झाली, त्यामुळे त्याचा प्रचार, मतदानावर थेट परिणाम होणार.

भाजपने २०१७ मध्ये राज्यातील ७० विधानसभेच्या ५७ जागा जिंकल्या होत्या, यावेळी सुद्धा निवडणुकीत प्रचाराच्या मध्यावर पक्षाने ‘मोदी फॅक्टर’वर प्रचाराची मोहीम तीव्र केली आहे.

राज्यात २०१७ सारखी मोदी लाट नाही, असे खुद्द भाजपचे नेतेही मानतात, पण मोदींच्या पसंतीस उतरण्यासाठी भाजपने राज्यात आपली रणनीती बदलली आहे. या अंतर्गत भाजपने आता ‘उत्तराखंड की पुकार, मोदी-धामी सरकार’ अशा घोषणा देत सर्व विधानसभांमध्ये प्रचाराची मोहीम तीव्र केली आहे. लोकांमध्ये मोदींना बळ देण्याचा संदेश कसा द्यायचा आहे, हेही उमेदवार आणि कार्यकर्त्यांना समजावून सांगण्यात आले आहे. जनतेला मात्र आता बदल हवा आहे. त्यामुळे राज्यातील काँग्रेस आणि इतर पक्षांनी वेगळी रणनीती आखली आहे.

थंडीच्या कडाक्याने नेत्यांना धडकी..

उत्तराखंडमध्ये १४ फेब्रुवारीला होणाऱ्या विधानसभा निवडणुकीसाठी राजकीय पक्षांनी पूर्ण ताकद लावली आहे. पाऊस आणि हिमवृष्टीच्या कठीण वातावरणातही राजकीय पक्षांचा प्रचार जोरदार सुरू आहे. हवामानामुळे निवडणुकीचा प्रचार विस्कळित झाला आहे. पंतप्रधान मोदींच्या रॅलीसह अनेक राजकीय कार्यक्रम रद्द झाल्याची बाब समोर आली आहे. गढवाल प्रदेशातील उत्तरकाशी, टिहरी, रुद्रप्रयाग आणि चमोली जिल्ह्यातील उंचावरील गावे बर्फाने झाकली गेली आहेत. गंगोत्री विधानसभेची दहा गावे, यमुनोत्री विधानसभेची पाच आणि उत्तरकाशी जिल्ह्यातील १५ गावे बर्फाच्या कुशीत आहेत. अनेक रस्ते बंद असल्याने प्रचारात अडथळे निर्माण होत आहेत.